Mag-ingat sa Simoniya!
HALANGKAW an pagheling ki Simon na taga Samaria sa saiyang komunidad. Nabuhay sia kaidtong enot na siglo C.E., asin an mga tawo naatraer na gayo sa saiyang pagmamahika kaya sinda nagsasabi dapit sa saiya: “An tawong ini iyo an Kapangyarihan nin Dios, na maaapod na Dakula.”—Gibo 8:9-11.
Minsan siring, kan si Simon magin bautisadong Kristiano, may nariparo siang kapangyarihan na mas makosog nanggad kisa sa ipinaheling nia kaidto. Idto an kapangyarihan na itinao sa mga apostol ni Jesus, na nagpangyari sa sainda na makapagtao sa iba kan milagrosong mga balaog kan banal na espiritu. Gulat na marhay si Simon kaya inalok nia nin kuarta an mga apostol asin nakiolay: “Tawe man ako kan autoridad na ini, tanganing an siisay man na bugtakan ko kan sakong mga kamot mag-ako kan banal na espiritu.”—Gibo 8:13-19.
Sinaway ni apostol Pedro si Simon, na sinasabi: “Matunaw logod na kaiba mo an saimong pirak, huli ta naghona ka na dahel sa pirak kakamtan mo an daing bayad na balaog nin Dios. Dai kang kabtang o kahirasan sa bagay na ini, huli ta an saimong puso bakong matanos sa pagheling nin Dios.”—Gibo 8:20, 21.
Gikan sa pagkasaysay na ini sa Biblia an terminong “simoniya,” na tinawan nin kahulogan na “an kasalan na pagbakal o pagpabakal nin mga katongdan o promosyon sa iglesia.” Inaadmitir kan New Catholic Encyclopedia na nangorogna poon kan ika-9 sagkod ika-11 siglo “an simoniya lakop sa mga monasteryo, sa mas hababang klero, sa episkopado, asin sa papado pa ngani.” An ikasiyam na edisyon kan The Encyclopædia Britannica (1878) nagsasabi: “An pagsiyasat sa kasaysayan kan pribadong pagtiripon sa pagpili nin Papa nakakokombensir sa estudyante na mayo pang ginibong eleksion na dai nadigtaan nin simoniya, mantang sa kadakol na pangyayari an simoniya na ginibo sa pribadong pagtiripon iyo an pinakagrabe, pinakadaing sopog, asin pinakahayag.”
An tunay na mga Kristiano ngonyan dapat na mag-ingat sa simoniya. Halimbawa, an nagkapira tibaad pagparaomaw-omawon o pagpararegalohan an mga puedeng magtao sa sainda nin dugang pang mga pribilehio. Sa kabaliktaran, an mga puedeng magtao kan siring na mga pribilehio tibaad magpaheling nin paboritismo sa mga kaya—asin parateng gustong-gusto—na magparatao sa sainda nin regalo. Kalabot sa duwang situwasyon an simoniya, asin malinaw na kinokondenar kan Kasuratan an siring na gawe. “Kun siring magsolsol ka kan karatan mong ini,” an sadol ni Pedro ki Simon, “asin makimaherak ka ki Jehova na, kun puede, ipatawad sa saimo an pakana kan saimong puso [“an mukna mong ini,” New Jerusalem Bible]; huli ta naheheling ko na ika nakakahilong apdo asin gapos nin karatan.”—Gibo 8:22, 23.
Nakaoogma na naheling ni Simon an pagigin seryoso kan saiyang salang kamawotan. Nakimaherak sia sa mga apostol: “Magngayongayo kamo ki Jehova para sa sako tangani na mayo sa mga bagay na sinabi nindo an dumatong sa sako.” (Gibo 8:24) Kinukuyog an mahalagang leksion na yaon sa pagkasaysay na ini, an tunay na mga Kristiano nagmamaigot na likayan an ano man na digta nin simoniya.