Anong Klaseng Ngaran Igwa Kamo?

SA Biblia, an terminong “ngaran” kun beses nanonongod sa reputasyon nin saro. Halimbawa, an madonong na si Hadeng Salomon nagsurat: “An ngaran mas marahay kisa sa marahay na lana, asin an aldaw nin pagkagadan kisa sa aldaw nin pagkamundag.” (Eclesiastes 7:1; ikomparar an Talinhaga 22:1.) Segun sa mga tataramon ni Salomon, an saro dai namumundag na may marahay na ngaran. Imbes, durante kan saiyang buhay na sia nagkakaigwa nin reputasyon na may tunay na kahulogan. An saiyang ngaran an nagpapamidbid sa saiya kun dapit sa saiyang personal na mga kualidad, kun baga sia matinao o maimot, madinamayon o indiperente, mapakumbaba o maabhaw, matanos o maraot pa ngani.

Estudyare si David. Durante kan saiyang paghade, pinatunayan nia na sia makosog asin marigon. Kadungan kaiyan, mapakumbabang inadmitir ni David an saiyang mga sala asin nagsolsol sa saiyang magabat na mga kasalan. May marahay na dahelan, sinabi nin propeta ni Jehova na si David “sarong lalaki na nasusunoan kan . . . puso” nin Dios. (1 Samuel 13:14) An hoben na si David igwa nang marahay na ngaran sa Dios.

Sa kabaliktaran, si Hadeng Joram nin Juda naggibo nin maraot na ngaran para sa saiya. Itinalikod nia an saiyang mga sakop sa pagsamba ki Jehova asin ipinagadan pa ngani an saiyang anom na tugang na lalaki asin nagkapirang prinsipe sa Juda. Sa kahurihurihi, pinapagdusa ni Jehova si Joram nin makolog na helang na suminagkod sa saiyang kagadanan. An Biblia nagsasabi na si Joram “naghale na dai lamang hinanap,” o siring sa pagkasabi kan Today’s English Version, “mayo lamang nin nagmondo kan sia magadan.”​—2 Cronica 21:20.

An nagin buhay ni David asin Joram nag-iilustrar kan pagigin totoo kan talinhaga sa Biblia: “An pakagirumdom sa matanos may natatagamang bendisyon, alagad ta an mismong ngaran kan mga maraot malalapa.” (Talinhaga 10:7) Maninigo kun siring na seryosong horophoropon kan lambang saro sa sato an hapot na, ‘Anong klaseng ngaran an ginigibo ko sa Dios asin sa sakong kapwa tawo?’