Hihimateon daw Nindo an Patanid?
KAN Mayo 19, 1997, sarong buwawi an uminagi sa distrito nin Chittagong, Bangladesh. An doros na haros 250 kilometros por ora ikinarekord sa banwaan nin Cox Bazaar. Sa puerang mga lugar, nawara na sana an mga payag-payag, na nagwalat nin saradit na kuadradong laboy sa dating natotogdokan kan mga iyan. Nagabot an mga kahoy asin poste sa telegrapo; an iba nagkabarari sa kabangaan na garo mga palito. An sarong titulo sa diaryong Bhorar Kagoj nagbareta na 105 katawo an nagadan sa buwawi.
An departamento sa kamugtakan nin panahon ibrinodkast an kinakalkulong aagihan kan buwawi mga 36 na oras pa bago kaiyan. Daing duwa-duwa, dakol an nakaligtas ta ginatos na ribo katawo an nagpaili sa konkretong mga pahiplian sa buwawi.
Sa laog nin labi nang sanggatos na taon ngonyan, an Mga Saksi ni Jehova nagbobrodkast nin bareta dapit sa sarong nagdadangadang na kalamidad na labi pa kamapanlaglag kisa sa ano man na buwawi. Inaapod iyan kan Biblia na an “dakula asin makangingirhat na aldaw ni Jehova.” (Joel 2:31) Paagi sa paghimate sa makahulang mga mensahe nin patanid na yaon sa Biblia, kita puedeng makaligtas sa kabangisan kaiyan.—Sofonias 2:2, 3.
Dai, an Mga Saksi ni Jehova bakong mga propeta na nagsasabi nin nagdadangadang na kalaglagan. An sainda mensahe nin paglaom. Mawot ninda na tabangan an mga tawo na makanood manongod sa Kahadean nin Dios, na sa dai na mahahaloy hahaleon sa daga an gabos na karatan. An Tataramon nin Dios, an Biblia, nagsasabi sa sato: “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan.”—Salmo 37:10, 11.
nalilista sa pahina 2.
[Pasasalamat para sa pinagkuanan kan retrato sa pahina 32]
WHO/League of Red Cross