‘Halangkaw Siring sa Sedro sa Libano’

SA MAGAYON na kabukidan nin Libano may mga kahoy na an apod Arz Ar-rab, na an boot sabihon “mga Sedro kan Kagurangnan.” An kahangahangang mga kahoy na ini na pirmeng berde, na sarong beses nakatahob kaidto sa kabukidan, nasasambitan sa Biblia nin mga 70 beses—na mas dakol kisa sa ano man na iba pang kahoy.

Sa pagladawan kan halangkaw asin magayon na mga sedro nin Libano, ginagamit kan Kasuratan an mga tataramon na “pili” asin “halangkawon.” (Awit ni Salomon 5:15; Ezequiel 17:23) Huli sa kadakulaan kan sedro asin pagigin matagal kan kahoy kaiyan kaya haloy nang midbid iyan na ginagamit sa paggibo nin mga harong asin barko siring man nin muebles. An alimyo asin pagkapula kan kolor kan kahoy nakaaatraer na marhay, asin an pagigin madugta kaiyan an dahelan kaya dai tolos iyan nalalapa asin kinakakan nin mga insekto. An mga kahoy na iyan pambihira an langkaw asin kadakulaan, na nakakaabot sagkod sa 37 metros an langkaw asin sagkod sa 12 metros an kadakulaan, saka hararom, makosog an mga gamot kaiyan. Bakong makangangalas na an nagkapirang nag-aataman sa kadlagan sa presente ilinadawan iyan na “an nangingibabaw na kamurawayan kan kinaban nin mga tinanom”!

An Mesiyas makahulang iinagid kan kagsurat sa Biblia na si Ezequiel sa sanga nin sedro, na kaidto itinanom mismo nin Dios. (Ezequiel 17:22) Sa katunayan, an termino sa Hebreo para sa “sedro” hale sa pinakagamot na termino na an boot sabihon “magin marigon.” Ngonyan, an mga parasunod kan Mesiyas, si Jesu-Cristo, kaipuhan man na “manindogan na marigon sa pagtubod, . . . magin makosog,” siring sa halangkaw, masarig na sedro. (1 Corinto 16:13) Paano ini magigibo? Paagi sa marigon na pagtumang sa bakong sa Kristianong mga impluwensia asin pagdanay sa dalan nin integridad asin diosnon na debosyon. An mga naggigibo kaiyan ilinaladawan sa Biblia na “mga matanos . . . [na] minalangkaw siring sa sedro sa Libano.”—Salmo 92:12, The New English Bible.