Bareta kan mga Parabalangibog kan Kahadean

Binalosan an Paghanap sa Tunay na Dios

KAN ikasampulong siglo B.C.E., an duwang tribong kahadean nin Juda napano nin falsong pagsamba. Minsan siring, sa tahaw kan lakop na idolatriyang ini namuhay an sarong tawo na an puso tanos sa Dios. An saiyang ngaran Josafat. Si propeta Jehu nagsabi mapadapit sa saiya: “May marahay na mga bagay na nakua sa saimo, huli ta . . . inandam mo an saimong puso na hanapon an tunay na Dios.” (2 Cronica 19:3) Siring man ngonyan, sa “delikadong mga panahon [na ini] na masakit pakibagayan,” minilyon na tawo an ‘nag-andam kan saindang puso’ tanganing hanapon an tunay na Dios, si Jehova. (2 Timoteo 3:1-5) Pinatutunayan ini kan minasunod na eksperyensia hale sa Togo, Solnopan na Aprika.

Si Casimir naglaog sa Katolikong eskuelahan asin enot na nag-Komunyon sa edad na nuebe anyos. Minsan siring, kan sia 14 na, si Casimir uminontok sa pagsimba. Ikinatatakot nia ini kaidto huli ta sa paghona nia an pagpalta sa Misa magbubunga kan pagkapaduman nia sa naglalaad na impierno, o kisuerra sa purgatoryo.

Sa eskuelahan si Casimir nakiayon sa sarong grupo nin mga hoben na nagtitiripon sarong beses kada semana tanganing pag-adalan an Biblia. Pinonan man niang basahon an Biblia na sia sana. Sarong beses nabasa ni Casimir sa librong Kapahayagan an manongod sa sarong makatatakot na mabangis na hayop na nagtunga hale sa dagat. (Kapahayagan 13:1, 2) Kan hapoton nia an nangengenot sa grupo nin pag-adal sa Biblia manongod kaiyan, sinabi sa saiya na an hayop totoo asin na iyan aktuwal na matunga hale sa dagat. Ikinapurisaw ni Casimir an paliwanag na ini huli ta sia nag-eerok harani sa Baybayon nin Atlantiko. Nakombensir sia na makakabilang sia sa enot na mga biktima kan mabangis na hayop.

Nagpoon si Casimir na magdamot nin kuarta tanganing makadulag sia pasiring sa desierto duman sa amihanan tanganing malikayan an mabangis na hayop. Isinabi nia sa sarong kaklase an saiyang mga plano. Huling saro sa Mga Saksi ni Jehova, sinierto sa saiya kan kaklase na mayo kan siring na literal na hayop na matunga hale sa dagat. Dai nahaloy pakatapos kaiyan, si Casimir inimbitaran sa mga pagtiripon sa Kingdom Hall. Nagustohan nia an pagtiripon asin nagpoon na umatender nin regular. Inako man nia an sarong pag-adal sa Biblia sa harong.

Mantang nag-ooswag si Casimir sa saiyang pag-adal, nagpoon an pagtumang kan pamilya. An saiyang pamilya nagsasamba sa mga apoon asin nagkakakan nin karne na dai pinabolos an dugo na natada hale sa mga inatang. Kan si Casimir magalang na magsayuma na kumakan kan karne, sia hinuma asin sinabihan na humale sa harong. Si Casimir nagdanay na kalmado, asin dai man inotob an mga huma. Minsan siring, sa laog nin tolong bulan an siring na karne sana an pagkakan kan pamilya. Namroblema si Casimir kun paano makakakakan nin igo, alagad tinios nia ini asin an iba pang kasakitan.

Si Casimir padagos na nag-oswag sa espirituwal sagkod na magdusay asin magpabautismo. Kan huri, ninombrahan siang ministeryal na lingkod asin nag-atender sa ikaapat na klase kan Paadalan sa Ministeryal na Pagsasanay sa Togo. Sa presente, sia nagtatrabaho bilang boluntaryo sa sangang opisina.

Iyo, nagin totoo nanggad an mga tataramon ni Hadeng David sa dakol na pangyayari: “Kun hanapon mo [si Jehova], mapakua sia sa saimo.”—1 Cronica 28:9.

[Mga retrato sa pahina 8]

Si Casimir (nasa too) nagtatrabaho bilang boluntaryo sa sangang opisina