Sarong Harayo Asin Sadit na Isla

“HARAYO” asin “sadit” an pinakaparateng ginagamit na adhetibo sa paglaladawan kan isla nin St. Helena. Angay sana iyan, ta an islang ini, na 17 kilometros an laba asin dies kilometros an lakbang, 1,950 kilometros an distansia sa pinakaharaning daga, an timog-solnopan na baybayon nin Aprika. Digdi ipinadara si Napoléon Bonaparte kan 1815 tangani na taposon an natatada pang mga taon kan saiyang buhay bilang nadaog na desterrado.

Kun hehelingon hale sa kadagatan an isla garo sarong masakit daogon na kuta. An totoo iyan sarong gadan nang bulkan na biyong patukad na minabutwa hale sa Atlantiko na may tugdok na marhay na mga kantil na 500 sagkod 700 metros an langkaw. Sa sentro kaiyan, an Bukid nin Acteon, sa langkaw na 818 metros, nanlalangkawan sa enterong isla. Huli sa mahayahay na doros sa Timog na Atlantiko na haleng sirangan paekwador asin sa solog kan kadagatan, an isla sa pankagabsan igwa nin suabe asin marahayrahay na klima. Alagad poon sa nasa kababan na kalabaan nin baybayon sagkod sa mabukid na interior, balakid an pagkalaenlaen sa kamugtakan nin panahon asin mga pananom.

An St. Helena rogaring na kan Britania poon pa kan huring kabtang kan ika-17 siglo. An sadit na populasyon na mga 5,000 kombinasyon nin mga tawong gikan sa Europa, Asia, asin Aprika. Ingles an lenguahe kan bilog na isla, alagad iyan itinataram na may nagpapamidbid na punto sa pagtaram. Mayo nin aeropuerto digdi; an solamenteng koneksion sa luwas paagi sa barko, na may regular na biahe pasiring sa Aprika del Sur asin Inglaterra. An totoo, nagkaigwa nin brodkast sa telebisyon kaidto sanang kabangaan kan mga taon nin 1990 huli sa koneksion sa satelayt.

Kan enot na mga taon nin 1930, an maogmang bareta kan Kahadean nin Dios nakaabot sa mga baybayon na ini sa kaenot-enote. (Mateo 24:14) Sa nakaaging mga taon, dakol na taga isla an nangapot sa kayamanan na ini na nagpapangyaring mawaran nin halaga an materyal na kayamanan. (Mateo 6:19, 20) Ngonyan, an St. Helena igwa kan onra sa pagkaigwa nin proporsion nin Saksi sa populasyon na 1 sa 31, an pinakahalangkaw sa bilog na kinaban!

[Mapa sa pahina 24]

(Para sa aktuwal na format, helingon an publikasyon)

St. Helena

JAMESTOWN

Levelwood

APRIKA

OSEANO ATLANTIKO

St. Helena