“Namatean Ko an Katoninongan”

AN SARONG lalaki na nagtataram nin Aleman nagduman sa sarong kombension na inorganisar kan Mga Saksi ni Jehova tanganing “mag-espiya” sa mga Saksi. Taano? Katuyohan nia na “ibuyagyag an sektang ini asin iligtas an saiyang mga katood na dai malagalag.” Pakatapos na umatender sa kombension, ini an isinurat nia sa saiyang mga katood:

“Kan padangadang ako sa lugar kan kombension, inisip-isip ko kun ini man nanggad an lugar. Mayo akong naheheling na tawo sa luwas, asin mayo nin mga ramog o lata nin serbesa sa salog. Mantang parani ako, naheling ko an duwang lalaki sa laogan kan istadyum. Tinaratara ninda ako asin pinalaog ako.

“An linaoman ko madadangog ko an ribok kan rinibo na sinasabing yaon duman, alagad toninong na marhay. ‘Bueno,’ sa isip ko, ‘seguro kakadikit sana an tawo na wararak sa bilog na lugar na iyan.’

“Paglaog ko, an atension ko tolos-tolos na napaduman sa sarong drama na isinasaaksion sa plataporma. Kan huri ko sana narealisar na an istadyum pano-pano nin rinibo na atentong naghihinanyog. Namatean ko an katoninongan. Hararom an nagin epekto sa sako kan sakong nadangog, naheling, asin namatean durante kan natada pang kabtang kan kombension.

“Mantang nakikisalak sa mga Saksi, dai ko malikayan na mariparo an saindang maogmang mga lalauogon asin mamomoton na mga kapahayagan. Bigla na sana, dai ko mapogolan na isipon na, ‘An mga ini talaga an banwaan nin Dios!’”

Imbes na “iligtas an saiyang mga katood na dai malagalag,” an hoben na lalaki nakiolay sa sainda na adalan sia sa Biblia. An resulta? Ngonyan, sia saro nang Kristianong magurang sa kongregasyon. Sia asin an saiyang pamilya aktibo sa saro sa mga kongregasyon sa Zug, Switzerland.