Ibinalik an Ngaran nin Dios

“PAKATAPOS na haleon an ngaran na Jehova sa mga Biblia sa laog nin dakol na taon asin tibaad mga siglo, an saiyang mga saksi sa presenteng aldaw iyo an solamenteng Kristianong relihion na nanindogan asin ibinalik an tetragrammaton.”a

An mga tataramon sa enotan hale sa librong Jeová dentro do judaísmo e do cristianismo (An Jehova sa Judaismo Asin Kristianismo), kan parasurat na taga Brazil na si Assis Brasil. Alagad puedeng ihapot, Maski ngani kadikit na traduksion nin Biblia an naggagamit kan ngaran nin Dios sa laen-laen na porma, taano ta hinale iyan kan ibang relihion sa saindang mga Biblia? “An ngaran nin Dios hinale,” sabi ni Brasil, “magsalang huli sa superstisyon . . . , natatagong mga motibo, o sa kamawotan na ilangkaw an ngaran ni Jesus asin kan saiyang ina, si Maria.”

Minsan siring, arog kan tama sanang sabihon ni Mr. Brasil: “An paghale kan ngaran [nin Dios] biyo nang ikinorehir sa Portugues kan New World Translation of the Holy Scriptures.” Taano man? Huling an ngaran na Jehova ibinalik sa tamang lugar kaiyan sa Biblia na iyan. An ngaran na Jehova minalataw nin labing 7,200 na beses sa New World Translation.

Poon kan enot na iluwas iyan, labi nanggad sa anom may kabangang milyon na kopya kaining moderno, literal na traduksion sa Portugues an ikinawaras. Sa siring, ini an dahelan kaya naghapot an sarong peryodista na nagsusurat sa peryodiko sa Brazil na Diário do Nordeste (Diaryo sa Amihanan-sirangan), “Aram daw nindo na an Dios igwa nin ngaran?” Huli sa modernong traduksion na ini kan Biblia, minilyon an makasisimbag ngonyan nin, “Iyo. An ngaran nin Dios Jehova.”

[Nota sa Ibaba]