Inomaw kan mga Autoridad an mga Saksi

SA Cádiz, España, sarong siudad na duungan na mga 500 kilometros sa timog-solnopan nin Madrid, an alkalde na si Doña Teófila Martínez nagtao nin sarong plake (nasa retrato sa itaas) sa Mga Saksi ni Jehova. Iyan nagsasabi: “An munisipyo kan siudad nin Cádiz para sa Mga Saksi ni Jehova bilang apresasyon sa saindang pakikipagtabangan asin mga paghihingoa para sa siudad na ini.” Ano an ginibo kan mga Saksi tangani na mag-ako kan onrang ini?

Itinao iyan bilang pagrekonoser sa ginibo kan mga Saksi na paghirahay sa kabtang kan istadyum kan munisipyo kan siudad. Sa laog nin nagkapirang Sabado asin Domingo, ginatos na Saksi an nagboluntaryong tumabang sa paghirahay kan mga kasilyas sa sirong kan putbol istadyum sa Carranza. Ngonyan, an gabos na naggagamit kan istadyum nakikinabang sa ininstalar na mga agwas, ikinanang tubo, asin salog.

Sa haloy-haloy nang panahon, marahay an relasyon kan Mga Saksi ni Jehova sa siudad nin Cádiz. Kada taon, may kabootan na ipinagagamit sa mga Saksi kan munisipyo kan siudad an Carranza Istadyum para sa saindang taonan na pandistritong kombension. Kun siring, naoogma an mga Saksi na gibohon an saindang pinakamakakaya na makatabang na papagdanayon an istadyum na nasa marahay na kamugtakan.

Minsan siring, dugang pa sa paminsanminsan na pisikal na mga trabaho, regular na nagdadalaw an Mga Saksi ni Jehova sa mga komunidad kan siudad tangani na suportaran an publiko sa ibang paagi. Ibinabalangibog ninda an “maogmang bareta” kan Kahadean nin Dios. Siempre, dai sinda nakikikabtang sa saindang ministeryo sa publiko tanganing mag-ako nin pag-omaw hale sa mga tawo. Iyan ginigibo bilang pagkuyog sa pagboot ni Jesus na ihulit an ‘maogmang bareta kan kahadean’ asin na ‘gumibo nin mga disipulo sa mga tawo kan gabos na nasyon.’ (Mateo 24:14; 28:19) Paagi kaini, minamawot kan Mga Saksi ni Jehova na maglingkod sa komunidad paagi sa pagtokdo sa mga tawo sa “dalan nin katanosan.”—Talinhaga 12:28.