Katoninongan sa Kinaban—Saen Magikan?
AN PAGPALAKOP daw sa bilog na globo kan edukasyon asin relihion magtatao nin katoninongan sa kinaban? Ini an kamawotan ni Dr. Robert Muller, dating katabang na sekretaryo-heneral kan Naciones Unidas asin nagresibi kan 1989 Premyong UNESCO Para sa Edukasyon Pankatoninongan. Siring sa ibinareta sa diaryong The Vancouver Sun, si Dr. Muller “kombensido na an gabos na estudyante sa kinaban dapat na tokdoan kan pinakasentrong mga impormasyon asin pamantayan dapit sa planeta, katawohan asin kadaihan nin kadahasan.” Iniimahinar nia an aldaw na sa bilog na kinaban an gabos na institusyon sa pag-adal totokdoan an mga aki manongod sa NU bilang an pinakamarahay na paglaom para sa katoninongan. Naniniwala man sia na “an gabos na relihion sa kinaban maninigong magin mga miembro nin sarong bagohan na arog-NU na organisasyon na inaapod Nagkakasararong mga Relihion,” an bareta kan Sun. Dangan “palalakopon kan gabos na katokdoan sa relihion an kadaihan nin kadahasan.”
Mangyayari pa daw an katoninongan sa kinaban? Sierto nanggad! Alagad bakong paagi sa arin man na ahensia nin tawo. Labing 2,700 na taon na an nakaagi, an sarong pinasabngan na parasurat ipinamidbid an nakalalabi sa gabos na gikanan nin edukasyon para sa katoninongan kan ihula nia na an mga matanos an puso ‘totokdoan ni Jehova,’ asin an katoninongan ninda magigin “abunda.”—Isaias 54:13.
An Dios an “nagtatao nin katoninongan,” an sabi kan Biblia. (Roma 16:20) Minsan ngonyan an sarong makangangalas na panglobong programa nin edukasyon naponan na mantang tinotokdoan ni Jehova an saiyang banwaan na ‘hanapon an katoninongan asin gibohon iyan,’ na ‘daragopdopon an saindang mga espada na magin tarom nin arado,’ asin na dai na ‘mag-adal sa pakilaban.’—1 Pedro 3:11; Isaias 2:2-4.
An pagsamba na basado sa katotoohan, na mayo nin pagsaginsagin asin pandadaya, inooyonan asin binebendisyonan nin Dios. (Mateo 15:7-9; Juan 4:23, 24) Solamente an tunay na pagsamba, na lubos na kaoyon sa Tataramon nin Dios, an makapoprodusir nin mga tawo na namumuhay na may katoninongan asin pagkasararo asin igwang tunay na pagkamoot sa lambang saro.—Juan 13:35.
Tangani na dakol pang manodan manongod sa sinasabi kan Tataramon nin Dios mapadapit sa katoninongan sa kinaban, iniimbitaran niamo kamo na kontakon an mga kagpublikar kan babasahon na ini.