Nagigirumdoman Daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan? Bueno, helingon kun masisimbag nindo an minasunod na mga hapot:

◻ Taano an mga tataramon ni Pablo na “mga embahador na karibay ni Cristo” ta angay na marhay para sa linahidan na mga Kristiano? (2 Corinto 5:20)

Kan suanoy na mga panahon, sa pangenot isinusugo an mga embahador sa mga panahon nin pagkakalaban tanganing helingon kun baga puedeng malikayan an guerra. (Lucas 14:31, 32) Mantang an makasalan na kinaban nin katawohan siblag sa Dios, isinugo nia an saiyang linahidan na mga embahador tanganing ipaaram sa mga tawo an saiyang mga kondisyon sa pakiulian, na sinasadol sinda na makipagkatoninongan sa Dios.—12/15, pahina 18.

◻ Ano an apat na bagay na nagpakosog sa pagtubod ni Abraham?

Enot, ipinaheling nia an saiyang pagtubod ki Jehova paagi sa paghimate kun nagtataram an Dios (Hebreo 11:8); ikaduwa, an saiyang pagtubod konektadong marhay sa saiyang paglaom (Roma 4:18); ikatolo, si Abraham parateng nakipag-olay ki Jehova; asin ikaapat, sinuportaran ni Jehova si Abraham kan sunodon nia an paggiya nin Dios. An iyo man sanang mga bagay puedeng magpakosog sa satong pagtubod ngonyan.—1/1, pahina 17, 18.

◻ Ano an boot sabihon kan mga tataramon na “Dai mo kami darahon sa sugot”? (Mateo 6:13)

Hinahagad niato sa Dios na dai itogot na kita madaog kun kita nasusugotan na makisuway sa saiya. Magigiyahan kita ni Jehova tangani na dai kita padaog asin masaroan ni Satanas, an “maraot.” (1 Corinto 10:13)—1/15, pahina 14.

◻ Ano an dapat na gibohon nin saro tanganing mag-ako kan kapatawadan nin Dios sa salang ginibo?

An pagbuyboy sa Dios dapat na may kaibang pagbasol asin “mga bunga na angay sa pagsolsol.” (Lucas 3:8) An nagsosolsol na espiritu asin an kamawotan na itanos an sala mapahiro man sa saro na hagadon an espirituwal na tabang kan kamagurangan na Kristiano. (Santiago 5:13-15)—1/15, pahina 19.

◻ Taano ta maninigo kitang maghingoa na magin mapakumbaba?

An tawong mapakumbaba mapasensia asin matinios, asin sia dai labi-labing nagpapahalaga sa saiyang sadiri. An kapakumbabaan nakaaakit nin tunay na mga katood na namomoot sa saindo. Orog pa kaiyan, iyan nagbubunga kan bendisyon ni Jehova. (Talinhaga 22:4)—2/1, pahina 7.

◻ May anong importanteng pagkakalaen an kagadanan ni Jesus asin an ki Adan?

An kagadanan ni Adan maninigo, ta tuyo siang nakisuway sa saiyang Kaglalang. (Genesis 2:16, 17) Sa kabaliktaran, an kagadanan ni Jesus biyong dai maninigo, ta “dai sia nakaginibo nin kasalan.” (1 Pedro 2:22) Kaya kan si Jesus magadan, sia igwa nin bagay na dakulaon an halaga na mayo sa parakasalang si Adan kan ini magadan—an diretso sa sangkap na buhay nin tawo. Sa siring, may halagang pan-atang an kagadanan ni Jesus sa pagtubos sa katawohan.—2/15, pahina 15, 16.

◻ Sa makahulang bisyon ni Ezequiel, ano an ilinadawan kan siudad?

Mantang an siudad yaon sa tahaw nin sekular (bakong sagrado) na daga, sierto na iyan bagay na daganon. Kun siring, iyan malinaw na naglaladawan sa daganon na administrasyon na nagtatao nin pakinabang sa gabos na makompuesto sa matanos na daganon na sosyedad.—3/1, pahina 18.

◻ Taano ta hinanawan ni Jesus an bitis kan saiyang mga disipulo kan isineselebrar an Paskua kan 33 C.E.?

Si Jesus dai nag-iintrodusir nin sarong ritual sa paghanaw nin bitis. Imbes, tinatabangan nia an saiyang mga apostol na magkaigwa nin bagong aktitud—aktitud na may kapakumbabaan asin pagigin andam na gibohon an pinakamenus na gibohon para sa saindang mga tugang.—3/1, pahina 30.

◻ Sa satong pagtotokdo sa iba, ano an orog na mahalaga kisa sa natural na mga abilidad?

Iyan an mga kualidad na yaon sa sato asin an espirituwal na mga ugale na pinatalubo niato na puedeng arogon kan mga inaadalan. (Lucas 6:40; 2 Pedro 3:11)—3/15, pahina 12.

◻ Paano mapaooswag kan mga espiker sa publiko an saindang pagbasa kan Kasuratan?

Paagi sa pagpraktis. Iyo, paagi sa paorootrong pagbasa nin makosog sagkod na magibo ninda iyan nin marikas asin dirediretsong marhay. Kun may mga audiocassette sa Biblia, madonong na maghinanyog sa pagdodoon kan ideya asin pagliwatliwat kan tono kan nagbabasa asin mangnohon nindo kun paano pinopronunsiar an mga ngaran asin bihirang mga tataramon.—3/15, pahina 20.

◻ Paano ‘an espiritu minabalik sa Dios’ kun magadan an saro? (Eclesiastes 12:7)

Mantang an espiritu iyo an puersa nin buhay, iyan “minabalik sa tunay na Dios” sa sentido na an ano man na paglaom sa ngapit na buhay para sa tawong iyan ngonyan biyong nasa kamot na nin Dios. Solamente an Dios an makapababalik sa dati kan espiritu, o puersa nin buhay, na pinapangyayari an saro na mabuhay liwat. (Salmo 104:30)—4/1, pahina 17.