Kadahasan—Madali Nang Matapos Sagkod Lamang!
“An Kadahasan Nagsasapeligro sa Nasyon”—The New York Times, Estados Unidos.
“Kadahasan sa Harong”—O Globo, Brazil.
“An Kadahasan Sinusundan nin Patago an mga Babae sa Kinaban”—The Globe and Mail, Canada.
AN MGA titulong ini nin mga peryodiko sa Amerika del Norte asin del Sur nagpapaheling nin nakapupurisaw na dalagan nin mga pangyayari sa bilog na kinaban. Siring sa pagkasabi dian kan World Health Organization dai pa sana nahahaloy, “an kadahasan sa gabos na klase kaiyan bigla asin risang marhay na nag-orog sa dai pa sana nahahaloy na mga dekada.”
Helinga an nagkapirang nakapapepensar na estadistika:
Mga omisidyo. Sa Latin Amerika asin Caribe, mga 1,250 katawo an nagagadan sa madahas na paagi kada aldaw. Bilang resulta, “sa kabanga kan mga nasyon sa rehion, an paggadan an ikaduwang pangenot na dahelan nin kagadanan kan mga hoben na an edad 15-24.”
Kadahasan tumang sa mga aki: An pisikal, seksuwal, asin emosyonal na pagmaltrato sa mga aki problema sa bilog na kinaban. Halimbawa, “an mga surbey sa mga adulto sa nagkapirang industriyalisadong nasyon nagsusuherir na an 10%–15% kan mga aki biktima nin seksuwal na pag-abuso—na an kadaklan sa sainda aking babae.”
Kadahasan tumang sa mga babae: Pakatapos na imbestigaran an mga pag-abuso sa mga diretso nin tawo na nakomitir sa bilog na kinaban kan 1997, an mga parasiyasat nagkonklusyon na “an kadahasan sa laog nin pamilya nagin saro sa pangenot na mga dahelan nin danyos sa mga babae sa haros gabos na nasyon sa kinaban.” (Human Rights Watch World Report 1998) An kadahasan sa laog nin pamilya, na lakop pero dai ikinababareta nin igo na problema, inaapod ngonyan na “an silensiong krisis sa ika-20 siglo.”—The Globe and Mail, Canada.
An daga “napano [man] nin kadahasan” kaidtong kaaldawan ni Noe. (Genesis 6:9-12) Alagad ilinigtas ni Jehova Dios an “parahulit [na iyan] nin katanosan” asin an saiyang pamilya “kan pabahaan nia an kinaban nin maraot na mga tawo.” An Dios magibo nin kaagid na paghiro sa satong kaaldawan. Iingatan nia an “mga tawong may diosnon na debosyon” kun pohoon na nia an mga madahas asin maraot patin gibohon an dagang ini na magin paraiso sa saiyang ipinanugang bagong kinaban. (2 Pedro 2:4-9; 3:11-13) Dai daw kamo naoogmang maaraman na an kadahasan madali nang matapos sagkod lamang?