Bareta kan mga Parabalangibog kan Kahadean
“Sa Dios an Gabos na Bagay Posible”
AN MGA tataramon sa itaas, na manonompongan sa Mateo 19:26, nagin totoo para sa sarong hoben na babae sa Venezuela. Kan manodan nia na magtiwala nin lubos ki Jehova, napaglabanan nia an sarong magabat na problema. Isinasaysay nia:
“Maboot asin mamomoton na marhay an sakong lola. Makamomondo, sia nagadan kan ako 16 anyos pa sana. An saiyang kagadanan sarong mamondoon na pangyayari para sa sako. Nawaran ako nin timbang na isip, na habo ko nganing magluwas sa harong paduman sa natad. Sa kahurihurihi ako nagin haros biyong ermitanyo.
“Dai ako nag-eskuela, ni nagkaigwa man nin trabaho. Nagdanay na sana akong nasa kuarto. Mapungaw asin mayo lamang nin mga katood, ako nagkaigwa nin grabeng depresyon. Ako nakamate na biyong daing kamanungdanan asin nagmawot na magadan asin matapos na an sakong buhay. Pirme akong naghahapot sa sakong sadiri, ‘Taano ako ta nabubuhay?’
“Nakatodan kan sakong ina na mag-ako kan mga magasin na Torrengbantayan asin Awake! hale sa sarong hoben na Saksi na an ngaran Gisela. Sarong aldaw nariparo kan sakong ina si Gisela mantang sia minaagi sa samong harong asin hinapot sia kun matatabangan nia ako. Si Gisela nag-oyon na magprobar, alagad ako nagsayumang atubangon sia. Dai kaini nadesganar si Gisela. Sinuratan nia ako asin sinabi sa sako na gusto niang makikatood sa sako asin na may saro na mas mahalagang marhay kisa saiya na gusto man na makikatood sa sako. An personang iyan, sinabi nia, iyo si Jehova Dios.
“Napahiro kaini an boot ko, asin sinimbag ko an saiyang surat. Sa laog nin tolong bulan kami nagsuratan. Pakatapos sana nin balakid na pandadagka asin pagsadol ni Gisela na ako sa katapustapusi nagkaigwa nin kapusoan na hampangon sia. Sa primero ming paghelingan, si Gisela nakipag-adal sa Biblia sa sako, na ginagamit an librong Puwede Kamong Mabuhay Sagkod Lamang sa Paraiso Digdi sa Daga. Pakatapos kan pag-adal, inimbitaran nia ako na mag-atender sa sarong pagtiripon sa lokal na Kingdom Hall. Nabigla ako. Dai ako nagluluwas sa harong sa laog nin apat na taon, asin an isipon na ako nasa kalye nakasisindak.
“Si Gisela mapasensiang marhay sa sako. Sinierto nia sa sako na mayong dapat katakotan asin na iibanan nia ako sa pagtiripon. Nagtogot ako sa katapustapusi. Pag-abot mi sa Kingdom Hall, nagpoon akong magtakig asin ganoton. Dai ko mataratara dawa siisay man. Minsan siring, nag-oyon ako na ipadagos an pag-atender sa mga pagtiripon, asin si Gisela fiel akong hinahapit serosemana.
“Tanganing tabangan ako na paglabanan an sakong nerbios, amayon akong dinadara ni Gisela sa mga pagtiripon. Nagtitindog kami sa may pinto asin tinataratara an lambang tawo pag-abot ninda. Sa paaging iyan saro-saro o duwa-duwang tawo sana an nakakaatubang ko, imbes na sarong bilog na grupo nin durungan. Kun sa paghona ko dai ko na iyan kaya, kinokotar sa sako ni Gisela an Mateo 19:26: ‘Sa mga tawo ini imposible, alagad sa Dios an gabos na bagay posible.’
“Maski ngani bakong pasil, pag-abot nin panahon nakaatender ako sa mas dakula pa nganing pagtiripon nin mga tawo sa sarong pansirkitong asamblea. Dakulaon nanggad na lakdang idto para sa sako! Kan Setyembre 1995, nagmapuso akong kaolayon an kamagurangan manongod sa pakikikabtang sa ministeryo sa harong-harong. Pakalihis nin anom na bulan, kan Abril 1996, sinimbolisaran ko an sakong pagdusay ki Jehova paagi sa bautismo sa tubig.
“Kan may maghapot sa sako kasuarin pa sana kun paano ako nagkaigwa kan kapusoan na gibohon ini, ako nagsimbag: ‘An sakong kamawotan na paogmahon si Jehova mas makosog kisa sakong takot.’ Minsan ngani ako inaatake pa man giraray paminsanminsan nin depresyon, an sakong kagayagayahan nadadagdagan kan sakong paglilingkod bilang regular payunir. Ginigirumdom an nakaagi, minaoyon nanggad ako ki Gisela. Igwa na ako ngonyan nin sarong Katood na interesado sa sako asin ‘nagtatao nin kapangyarihan sa sako.’”—Filipos 4:13.
[Mga retrato sa pahina 8]
An sakong kamawotan na paogmahon si Jehova mas makosog kisa sakong takot”