An Kadonongan na ‘Helingon Antes Pa an Mangyayari’

“SINDA sarong banwaan na nawaran kan saindang marahay na pag-iisip asin mayo nin pakasabot. Kun sinda madonong, ini masasabotan ninda asin maheheling antes pa an mangyayari sa sainda.”—Deuteronomio 32:28, 29, Beck.

An mga tataramon na ini sinabi ni Moises sa mga Israelita mantang sinda nasa linderos kan Dagang Panuga. Ihinuhula kaidto ni Moises na maabot an panahon na babayaan ninda si Jehova asin dai lamang hohorophoropon an kaaabtan kan saindang gawe-gawe. Durante kan suminunod na mga siglo, an banwaan nin Israel—kabale an dakol na hade—inignoro an mga patanid nin Dios.

Halimbawa, aram kaidto ni Salomon an pagboot nin Dios na dai mag-agom nin mga parasamba sa mga dios apuera ki Jehova. (Deuteronomio 7:1-4) Minsan siring, sia nagkaigwa nin “dakol na agom na dayo.” An resulta? An rekord kan Biblia nagsasabi: “Nangyari kan panahon na gurang na si Salomon na ikinakiling na kan saiyang mga agom na babae an saiyang puso na sumunod sa ibang mga dios; asin an saiyang puso dai nagin bilog ki Jehova na saiyang Dios arog kan puso ni David na saiyang ama.” (1 Hade 11:1, 4) Minsan ngani madonong na tawo, si Salomon mayo kan marahay na pag-iisip na ‘helingon antes pa an mangyayari’ kun suwayon nia an pagboot nin Dios.

Kumusta man kita? Malilikayan ta an dakol na kakologan kun tatawan ta nin igong patienot na paghorophorop an mga pagdedesisyon sa buhay. Halimbawa, an mga Kristiano sinasadol na sinda ‘magpakalinig sa lambang ramog nin laman asin espiritu.’ (2 Corinto 7:1) Madonong ini, alagad dakol an mayo nin marahay na pag-iisip na helingon antes pa an puedeng mangyari kun dai ninda intindihon an hatol ni Pablo. Halimbawa, an dakol na hoben inaatian an saindang hawak paagi sa pagsigarilyo nin tabako, na naghohona na paagi kaini sinda maluwas na eksperyensiado sa kinaban asin nasa edad na. Makaturotriste nanggad na, sa huring kabtang kan buhay, dakol an nagkakaigwang helang sa puso, kanser sa pulmon, o paghubag bilang resulta!

Mahalaga na tawan nin seryosong paghorophorop an mga kaaabtan kan satong mga desisyon asin gawe-gawe. May marahay na dahelan, si Pablo nagsurat: “Ano man an itinatanom nin tawo, ini man an saiyang aanihon; huli ta sia na nagtatanom sa saiyang laman mag-aani man nin pagkatunaw sa saiyang laman, alagad an nagtatanom sa espiritu mag-aani nin buhay na daing katapusan gikan sa espiritu.”—Galacia 6:7, 8.