Giya sa Pagpili nin Marahay na Kairibaiba

AN MGA aki naghahagad nin giya sa saindang mga kaedad imbes na sa saindang mga magurang manongod sa gubing asin musika, an sabi nin sarong report sa Reader’s Digest. Kun siring mahalagang marhay na aramon nin mga magurang kun sairisay an kairibaiba kan saindang mga aki asin kun saen.

“Kamo an may paninimbagan na mag-imbestigar,” an sabi ni Esmé van Rensburg, mayor na paratokdo sa departamento nin sikolohiya sa sarong unibersidad sa Aprika del Sur. Sinabi pa nia: “May posibilidad na an saindong aki mauuyam sa saindo, alagad makalma sinda.” Dangan itinao nia an minasunod na mga suhestion sa mga magurang. An mga susundon maninigo na lohiko asin igwa nin depinidong pundamental na mga prinsipyo; hinanyogon an saindong aki; dai magin sobra an reaksion, kundi magin kalmado, asin aramon an gusto nindong sabihon. Kun an saindong aki nakipagkatood na sa sarong bakong marahay na kaibaiba, magkonsentrar sa bakong marahay na gawe-gawe na ibinunga kan pagkakatood imbes na bawalan sana na dai na makiibaiba.

An marahay na konseho para sa mga magurang haloy nang yaon sa Tataramon nin Dios, an Biblia. Halimbawa, iyan nagsasabi: “Magin listo kun dapit sa pagdangog, maluway kun dapit sa pagtaram, maluway kun dapit sa kaanggotan.” (Santiago 1:19) Itinatao man kan Kasuratan an marahay na konsehong ini manongod sa pagpili nin kairibaiba: “Sia na naglalakaw na kaiba nin mga madonong magigin madonong, alagad sia na nakiiiba sa mga lolong maraot an aabotan.” (Talinhaga 13:20) An mga halimbawang ini nagpapaheling kan kadonongan na makukua kan mga nagbabasa kan Biblia na may pag-apresyar asin iinaaplikar an sinasabi kaiyan sa aroaldaw na buhay.