“Kun an Asin Bako Nang Maasgad”

PINAGLABANAN iyan sa mga guerra. Ginamit iyan na pambayad. Sa suanoy na Tsina an halaga kaiyan panduwa sa bulawan. Iyo, an asin haloy nang ibinibilang kan katawohan na pinahahalagahan na marhay na produktong inenegosyo. Sagkod sa panahon na ini, iinaatribwir dian an nakabobolong asin nakadidisimpektar na mga kualidad, asin ginagamit iyan sa bilog na globo bilang pampasiram sa namit asin bilang pampreserba.

Huli sa dakol na kawiliwiling kualidad asin gamit kan asin, bakong makangangalas na iyan ginagamit sa Biblia sa piguratibong paagi. Halimbawa, an Ley ni Moises naghahagad na an anoman na idinodolot sa altar para ki Jehova kaipuhan na inasinan. (Levitico 2:13) Ini dai ginigibo tanganing orog na pasiramon an mga atang, kundi posibleng huli ta an asin nagrepresentar sa katalingkasan sa kalapaan.

Sa saiyang bantog na Sermon sa Bukid, sinabihan ni Jesu-Cristo an saiyang mga parasunod: “Kamo iyo an asin kan daga.” (Mateo 5:13) Paagi sa tataramon na ini, ipinarisa ni Jesus na an saindang paghuhulit sa iba manongod sa Kahadean nin Dios magkakaigwa nin potensial na nakapepreserbar, o nagliligtas-buhay, na impluwensia sa mga nagdadangog sa sainda. Tunay nanggad, an mga iinaplikar an mga tataramon ni Jesus mapoprotehiran sa moral asin espirituwal na pagkalapa sa mga komunidad kun saen sinda namumuhay asin naglilingkod.—1 Pedro 4:1-3.

Minsan siring, si Jesus nagpadagos na magtao nin patanid: “Alagad kun an asin bako nang maasgad, . . . dai na nin ano man na paggagamitan kaiyan kundi itatapok sa luwas tanganing timaktimakan nin mga tawo.” Nagkokomento manongod digdi, an nag-espesyalisar sa Biblia na si Albert Barnes nagsabi na an asin na aram ni Jesus asin kan saiyang mga apostol “bakong puro, nasalakan nin kemikal na mga bagay hale sa gulay asin daga.” Kaya kun an asin mawaran kan asgad kaiyan, tibaad may mawalat na “awad-awad na daga-daga.” “Ini,” an sabi ni Barnes, “daing kamanungdanan apuera sa . . . pagbugtak kaiyan sa mga dalan, o agihan, siring sa paggamit ta sa graba.”

Bilang paghimate sa patanid na ini, an mga Kristiano maninigong maghingoang dai pumondo sa saindang pagpapatotoo sa publiko o magbalik sa dating maraot na gawe-gawe. Ta kun dai sinda maluya sa espirituwal asin puedeng magin daing serbi, arog nin ‘asin na bako nang maasgad.’