“Maogmang Agom na Lalaki nin Sarong Kawiliwiling Agom na Babae”

KUN minsan, may mga tawong direktang inaakusar an Mga Saksi ni Jehova na rinaraot an mga pag-agoman. Minsan siring, an balakid na mapangganang pag-agoman kun saen saro sana sa mag-agom an saro sa Mga Saksi ni Jehova nagpapaheling na ini bako nanggad na totoo. An paghimate sa hatol kan Biblia sa buhay pampamilya nagbubunga nin maogmang mga pag-agoman, siring kan ipinaheheling kan minasunod na surat na ipinublikar sa sarong peryodiko sa Pransia.

“Sa laog nin haros 28 taon na ngonyan, ako nagin maogmang agom na lalaki nin sarong kawiliwiling agom na babae na saro sa Mga Saksi ni Jehova. Pinadakula nia an lima kong aki, na an duwa kaiyan bako niang aki, na pantay-pantay an pag-asikaso asin may dakulang pagkamoot. Bilang direktor ngonyan nin kompanya na may 45 empleyado, maaasegurar ko kamo na dakulaon an ikinakontribwir nia sa sakong kapangganahan sa propesyon. Iyan an dahelan na kan maheling ko an sarong artikulo sa sakong regular na peryodiko na pinaluluwas na an Mga Saksi ni Jehova nagtataong peligro sa rehion nin Lot-et-Garonne, nagdesisyon ako na tawan kamo nin may autoridad na patotoo.”

Sinasabi pa kan surat: “Dai sinda naninigarilyo o nagbuburat. Ini daw peligro? Sinda mga Kristianong mapagpabaya sa iba na dai ipinipirit sa kiisay man an mga ley na sinusunod ninda. Imbes, sinda halimbawa sa dakol na paagi. . . . Sinda dai kalabot sa mga iskandalo sa pinansial o sa negosyo sa droga. Dai sinda naggigibo nin promesa nin dai pakikidorog, asin maaasegurar ko kamo, sinda namumuhay nin normal. . . .

“Tibaad hapoton nindo ako: Kun siring, taano ta ika mismo bakong saro sa Mga Saksi ni Jehova? Huli ta kaipuhan an Kristianong pagtubod asin estriktong moral, asin an mga ini bakong madali na manompongan sa kadaklan na tawo.”