“Kapusoan na Minotibar nin Pagtubod”

KAN taon na 1998 ilinuwas, na may dakol na aklamasyon nin mga kritiko, an bagong libro sa Pranses na an titulo Les Témoins de Jéhovah face à Hitler (An Mga Saksi ni Jehova sa Atubangan ni Hitler), na isinurat ni Guy Canonici. Sa saiyang introduksion kan libro, an iginagalang na marhay na historyador na Pranses na si François Bédarida nagsurat: “Saro ining maogmang inaako na marhay na libro. Bako sanang huli ta iyan nagtatao nin impormasyon na dai pa aram, kundi huli ta napapanahon. . . . Apuera sa mga espesyalista, siisay an nakaaaram kan naabtan kan Mga Saksi ni Jehova sa irarom kan gobyernong Nazi? Pero, sa bilog na 12 taon na rehimen, sinda pinaglamag paagi sa daing herak na kaisogan asin kadahasan. Naeksperyensiahan man ninda an makatatakot na marhay na mga pangyayari sa mga kampo de konsentrasyon. Halangkaw man an nagin karibay kan saindang pagtubod asin mga kombiksion. Taano ta nalipasan sa kasaysayan an mga Kristianong ini? . . .

“Taano ta nagkaigwa nin siring na mabangis asin sistematikong paglamag sa sadit, wararak, asin dai nakadadanyar na denominasyon na ini? Ini an pinakaliabe sa pagsabot kan masakit paniwalaan pero totoo. An mga Saksi sa Alemania nagrerepresentar bako sanang kan saditon na minoriya kan populasyon—ipinaheheling kan estadistika na mga 20,000 sinda sa total na labing 60 milyon na nag-eerok—kundi sinda gabos matoninong na mga siudadano na iginagalang an ley asin bakong huma sa siisay man, na an mawot sana magtrabaho asin padakulaon nin tama an saindang mga aki. . . .

“An paglamag na ini napaatubang sa matagas asin mapangganang espirituwal na resistensia kan mga may pagtubod na kayang labanan an kosog kan impluwensia sa luwas kan panlaog na kosog kan saindang pagtubod ki Jesu-Cristo, na nagpoon sa pisikal na kadahasan kan Estadong pulis—sagkod sa punto nin eroismo asin pagigin martir.”

Mapuersa an estorya kan mga Saksi ni Jehova na nagdusa bilang mga martir huli sa saindang Kristianong pagtubod sa atubangan nin relihiosong pagkapanatiko. Sa pagsiyasat giraray kan libro, an sarong pangenot na Katolikong peryodiko sa Pransia, an La Croix, nakapahihirong nagsabi pa: “Mapadapit sa saindang kasaysayan na daing gayo aram, si Guy Canonici nakatipon nin kadakol na patotoo na nagpapangyari na mayong masabi an saro sa pakaheling nin kapusoan na minotibar nin pagtubod na ipinahayag sa pinakasimpleng mga tataramon, pagtubod na dai napanluluya sagkod sa katapusan dawa sa mga aki. An paggirumdom na ini maninigong magtao nin impormasyon na kaipuhan sa pagsabot sa presenteng debate manongod sa klase nin pagka-Kristiano kan Mga Saksi ni Jehova.”