Pagbalanse sa Trabaho Asin Paglilibang

“AN PAGLILIBANG sarong magayon na gubing, alagad dai iyan puede na pirepirmeng isulog.” Paagi sa mga tataramon na ini angay na iiniilustrar nin sarong dai nginaranan na parasurat an halaga nin paglilibang. Minsan siring, ipinaheheling nia na iyan maninigo na timbangan nin mabungang aktibidad.

An bagay na ini ipinaliwanag man kan pinasabngan na kagsurat kan Biblia na si Salomon. Isinabi kan madonong na hadeng ini an duwang pagpalabilabi na dapat likayan. Enot, sinabi nia: “An mangmang nangungurumo asin kinakakan an sadiri niang laman.” (Eclesiastes 4:5) Iyo, an kahugakan puedeng magdara sa saro sa kadukhaan. Bilang resulta, puedeng isapeligro kaiyan an salud kan hugakon, an saiyang buhay pa ngani. Sa ibong na lado, may nagkapira na isinasakripisyo an gabos na bagay dahel sa kahigosan. Sinabi ni Salomon na an saindang daing ontok na pagpapagal “daing kapakanan asin paglapag sa doros.”—Eclesiastes 4:4.

May marahay na dahelan, isinuherir ni Salomon an pagigin timbang: “Mas marahay an sarong hakbot nin pagpahingalo kisa duwang hakbot nin pagpapagal asin paglapag sa doros.” (Eclesiastes 4:6) An saro maninigo na ‘makaheling nin karahayan huli sa saiyang kahigosan’—an boot sabihon, sa panapanahon maninigo siang magtao nin panahon na mag-ogma sa saiyang nakukua. (Eclesiastes 2:24) Asin maninigo na igwa pa nin ibang bagay sa buhay apuera sa sekular na trabaho. An satong pamilya maninigo na tawan man niato nin panahon. Idinoon ni Salomon na an satong pangenot na obligasyon, bakong sekular na trabaho, kundi paglilingkod sa Dios. (Eclesiastes 12:13) Kabilang daw kamo sa mga igwa nin balanseng pagmansay sa trabaho?