Bareta kan mga Parabalangibog kan Kahadean
Teokratikong Paghiwas sa Namibia
AN MAOGMANG bareta kan Kahadean nin Dios enot na nakaabot sa Namibia sa huring kabtang kan mga taon nin 1920. Poon kan panahon na idto, ginatos na sadiosan an pusong mga tao an naghimate sa mensahe nin pagliligtas nin Dios. An minasunod na mga eksperyensia nagpapaheling kun paano tinitipon ni Jehova an mga kawiliwiling ini pasiring sa saiyang aripompon.—Haggeo 2:7.
◻ Si Paulus, sarong paraoma na an nakukua tama sanang may makakan na nag-eerok sa amihanan-sirangan na Namibia, enot na nakaolay kan mga Saksi ni Jehova kan sia magduman sa Windhoek, an kabiserang siudad. Si Paulus madaling nakombensir na saiya nang nanompongan an katotoohan. Nagpuli sia na igwa kan librong Puwede Kamong Mabuhay Sagkod Lamang sa Paraiso Digdi sa Daga. Dangan, kan nagbibiahe pasiring sa Rundu, an pinakaharaning banwaan na duman igwang Kingdom Hall, nanuparan ni Paulus an mga Saksi asin nakimaherak sa sainda na songkoon sia.
Minsan siring, harayoon an lugar tanganing makaduman an mga Saksi asin magkondukta nin semanal na pag-adal sa Biblia ki Paulus. Dai nadesganar, pinonan ni Paulus na adalan an Biblia na sia sana. Apuera kaiyan, maigot siang naghulit sa iba manongod sa mga bagay na saiyang nanonodan. Pag-abot nin panahon, may naorganisar na grupo nin pag-adal sa Biblia. Kan madangog kan sadit na grupong iyan sa radyo na magkakaigwa nin asamblea kan Mga Saksi ni Jehova sa Rundu, dinamot ninda an saindang dikit na ginaganar asin nag-areglo nin transportasyon tanganing umatender.
Abaa kanakapupukaw sa boot na eksperyensia idto para sa sainda na makiasosyar sa Mga Saksi ni Jehova sa kaenot-enote! Iinareglo tolos na may kualipikadong mga tugang na lalaki na regular na masongko sa grupong ini. Ngonyan, igwa na nin anom na parahayag sa baryong ineerokan ni Paulus.
◻ An interes ni Johanna sa ngaran nin Dios napukaw kan may madangog sia na nagtataram nin maraot dapit sa Mga Saksi ni Jehova. Natatandaan nia: “Sa kaenot-enoteng nadangog ko an ngaran na Jehova, iyan dai na napara sa isip ko, asin nagpoon akong mag-isip-isip kun siisay si Jehova. Nag-eerok kami kan sakong agom harani sa Walvis Bay sa baybayon nin Namibia. Sarong beses nagduman kami sa banwaan, asin may naheling akong mga Saksi na nagwawaras nin magasin na An Torrengbantayan sa tinampo. Nagkua ako nin sarong kopya asin naghagad na adalan sa Biblia, ta dakol an hapot ko. Naghibi ako kan paisihon ninda ako na dai sinda makakaduman huling naraot an saindang sasakyan. Dai nahaloy pakalihis kaiyan nagadan an agom ko, asin nag-istar ako sa Keetmanshoop. Sarong espesyal payunir (bilog na panahon na paraebanghelyo) an iinasignar na maghulit duman, asin nagkua ako sa saiya kan librong An Katotoohan na Minagiya Pasiring sa Buhay na Daing Sagkod. Sa primero pa sana, namidbid ko na an tanog nin katotoohan.
“Pag-abot nin panahon, inagda ako na umiba sa paghuhulit, alagad nadaog ako nin takot sa tawo. Mantang naglalakaw pasiring sa mga pinto, namibi ako ki Jehova na marahay pang togotan nia akong magadan kisa papaghuliton ako. Kan enot akong maghulit sa tinampo, nagtago ako sa hayakpit na eskinita, na naglalaom na mayong makaheling sa sako. Sa katapustapusi, nagkaigwa ako nin igong kapusoan na ipaheling an magasin sa sarong nag-aagi, asin kaidto ko sana nahimo na makataram. Kan aldaw na idto, sa tabang ni Jehova, ihiniras ko an sakong paglaom na basado sa Biblia sa kadakol na tawo.
“Ngonyan, pakalihis nin 12 taon, minsan ngani dukha sa materyal, mahal ko pa an pribilehio nin paglilingkod bilang payunir asin padagos akong nagkakamit nin dai masokol na kagayagayahan sa paghiras sa iba kan katotoohan sa Kahadean.”