Pag-atubang sa mga Angat nin Pagpadakula sa Aki

AN PAGPADAKULA sa mga aki ngonyan, nangorogna sa mga tinedyer, magabat na angat para sa mga magurang. An The Gazette kan Montreal, Canada, nagbabareta na an pag-eksperimento sa alkohol asin droga nagin “uso sa mga hoben.” Iyan nagdodoon na an mga magurang may “paninimbagan na magin alerto manongod sa mga pagbabago sa gawe-gawe kan [saindang] mga tinedyer.”

Ano an maninigong bantayan kan mga magurang na tibaad magparisa kan siring na mga problema nin hoben? Kaiba sa nagkapirang pisikal, emosyonal, asin sosyal na nagpapatanid na mga tanda na nadeterminaran kan Akademya sa Sikiyatriya kan Aki Asin Hoben sa Amerika an nagdadanay na kapagalan, pagbabago sa personalidad asin ugale, paglaom sa kuarto sa halawig na marhay na oras, malinaban na gawe-gawe, asin nadadakop na binabalga an ley.

Paano mapoprotehiran kan mga magurang an saindang mga aki sa siring na nakadadanyar na pag-eksperimento asin sa ibinubunga kaiyan na negatibong mga epekto? Si Dr. Jeffrey L. Derevensky, kan McGill University, naniniwala na an bukas na komunikasyon asin pagpaoswag sa paggalang kan saro sa saro durante kan mga taon na nagtatalubo pa sana an sarong aki puedeng inaan an mga problema sa huri. Sinabi pa kan The Gazette na dawa ngani lumataw an pagmawot para sa orog pang independensia durante nin pagkahoben, an mga tinedyer padagos na nangangaipo “kan paggiya, pagsuportar, areglo asin pagkamoot na itinatao kan saindang mga magurang.” An komentong ini inootro an sarong talinhaga sa Biblia na nagsasabi: “Patoodon mo an aki oyon sa dalan para sa saiya; minsan kun sia maggurang dai sia masiko dian.” (Talinhaga 22:6) Hinahatolan nin Dios an mga magurang na magin halimbawa, kaibaiba, parakomunikar, asin paratokdo.—Deuteronomio 6:6, 7.