Kun ‘an Doros Pasabat sa Sato’

Sa pagladawan kan aktuwal na eksperyensia kan mga disipulo ni Jesus mantang sinda nagsusumakit na dakiton an Dagat nin Galilea sakay nin baroto, an kagsurat kan Ebanghelyo na si Marcos nagsasabi na sinda “sinasakit sa paggaod, huli ta an doros pasabat sa sainda.” Mantang nasa baybayon pa, naheling ni Jesus an mamondong kamugtakan ninda asin milagrosong naglakaw sa ibabaw kan dagat tanganing makarani sa sainda. Kan nagsangkay sia sa baroto sa kaibahan ninda, naghupa an doros.​—Marcos 6:​48-​51.

An iyo man sanang kagsurat sa Biblia nagbareta na naenot pa dian, “nag-abot an [sarong] makosogon na bagyo nin doros.” Sa puntong iyan, “sinaway [ni Jesus] an doros . . . , asin an doros naghupa, asin nagkaigwa nin dakulang pagkalma.”​—Marcos 4:​37-39.

Minsan ngani kita ngonyan mayo nin pribilehiong maheling an siring na milagrosong mga pangyayari, dakol an manonodan ta sa mga iyan. Bilang bakong sangkap na mga tawo na nabubuhay sa peligrosong mga panahon, dai kita protektado sa mga doros nin kasakitan. (2 Timoteo 3:​1-5) Sa katunayan, kun beses tibaad magsaboot kita na an kapurisawan na konektado sa personal na mga pagbalo siring kakosog nin bagyo nin doros. Alagad may makukuang kaginhawahan! Ipinaaabot ni Jesus an pangagda: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo.”​—Mateo 11:28.

Kun garo baga ‘an doros pasabat sa sato,’ puede niatong maeksperyensiahan an “dakulang pagkalma” nin puso. Paano? Paagi sa pagtitiwala sa seguradong mga panuga ni Jehova Dios.​—Ikomparar an Isaias 55:​9-​11; Filipos 4:​5-7.