Pinakaekselenteng Taon Para sa Pagdistribwir nin Biblia
MAS dakol na tawo an may Biblia kisa kasuarin man. Iyan an isinusuherir nin sarong report hale sa United Bible Societies, huli ta an ikinadistribwir na Biblia kan 1998 luminangkaw nin labing kabangang milyon kisa kan nakaaging taon. Gabos-gabos, labing 585,000,000 na Biblia—bilog o kabtang—an ikinadistribwir sa bilog na globo. “Ini nakaparirigon sa boot,” an sabi kan bareta. “Mas dakol na tawo an napaaabotan kan Tataramon nin Dios ngonyan.”
Siempre, may kalaenan an pagkaigwa nin Biblia asin pagbasa kaiyan. Halimbawa, ihinayag nin sarong surbey na labing 90 porsiento kan mga Amerikano an igwa nin kisuerra sarong Biblia, asin an kaparehong bilang naniniwala na an Biblia marahay na gikanan nin pagtotokdo sa moral. Minsan siring, 59 porsiento sana an nagsabi na sinda nagkokonsulta sa Biblia para sa sadol. Asin 29 porsiento an nag-admitir na sinda magsalang “bakong gayo” o “bako talagang” pamilyar sa Biblia.
An Mga Saksi ni Jehova bako sanang nag-iimprenta asin nagdidistribwir nin mga Biblia kundi nagkokondukta man nin daing bayad na mga pag-adal sa Biblia sa mga tawo sa labing 230 kadagaan. Minilyon sa bilog na kinaban an nakikinabang ngonyan sa programang ini nin edukasyon sa Biblia. Sinda natatabangan na makaya an mga problema na inaatubang ninda ngonyan, asin aram ninda an sinasabi kan Biblia manongod sa maogmang ngapit sakop kan Kahadean nin Dios.—Isaias 48:17, 18; Mateo 6:9, 10.
[Mga Ritrato sa pahina 32]
Mga pag-adal sa Biblia sa (paitok patoo poon sa itaas, wala) Bolivia, Ghana, Sri Lanka, asin Inglaterra