An mga Tawo—Mas Halangkaw na Klase Sana daw nin mga Hayop?
“Mahalaga daw kun ano an satong pinaniniwalaan manongod sa ginikanan nin buhay?”
Ihinapot ini nin sarong 16 anyos na daragita sa Brazil sa introduksion kan saiyang pahayag sa topiko na “An mga Tawo—Mas Halangkaw na Klase Sana daw nin mga Hayop?” Inimbitaran sia kan maestra nia na magpahayag sa klase manongod sa hapot na iyan, pakaako kan maestra nin sarong kopya kan luwas kan Awake! na Hunyo 22, 1998 dapit sa topikong iyan.
Itinampok kan hoben na Saksi kun gurano nagin kapahapahamak an katokdoan na ebolusyon na basado sa natural na pagpili. Halimbawa, dakol na tawo an nagsasaboot na an teoriya nin ebolusyon minotibar an nagkapira na mansayon an guerra bilang natural sanang kabtang kan daing sagkod na pakipagtusayan sa pagkatadang buhay, na nakatabang na andamon an dalan para sa pagkamukna kan Fascismo asin Nazismo.
Ipinaheling kan estudyante na dakulaon an pagkakalaen kan mga tawo sa mga hayop. Sinabi nia: “Mga tawo sana an puedeng makapatalubo nin espirituwalidad. Mga tawo sana an naghihingoang aramon an kahulogan asin katuyohan nin buhay. Mga tawo sana an napupurisaw kan kagadanan, interesado manongod sa saindang ginikanan, asin may pagmawot na mabuhay sagkod lamang. Kanigoan kaimportante na kita magtao nin panahon na makanood nin orog pa manongod sa satong ginikanan!”
Inomaw kan maestra an marahayon na presentasyon. Iinatribwir nia an kapangganahan kaiyan sa bagay na an tinedyer na Saksi na ini gustong magbasa. Midbid an daragita sa eskuelahan bilang mahilig magbasa kan mga publikasyon na basado sa Biblia na arog kan Awake! asin An Torrengbantayan.
An Mga Saksi ni Jehova odok sa boot na nahahadit manongod sa epekto kan teoriya nin ebolusyon sa puso asin isip nin hobenes. Dahelan kaini, an kongregasyon na inaasosyaran kan daragitang ini inenkaminar an hoben na mga Saksi na tawan nin kopya kan magasin na Awake! na Hunyo 22, 1998 an saindang mga maestro asin kaeskuela. Mga 230 magasin an ikinadistribwir sa manlaenlaen na eskuelahan sa siudad. An namamayo kan Departamento sa Siensia sa sarong eskuelahan nagsuskribe nin magasin na Awake!
Iyo, mahalaga kun ano an pinaniniwalaan niato manongod sa ginikanan nin buhay! An hoben na ini asin an saiyang mga katood nagpaheling na an paniniwala sa Kaglalang nagbunga nin tunay na kalaenan sa saindang buhay.