An Hinihidaw Nia sa Siudad nin Nueva York

AN KARATULANG uya digdi iyo an naheheling na marhay sa saro sa mga edipisyong imprentahan kan Watchtower Society sa Brooklyn, Nueva York, poon pa kan mga taon nin 1950. Napagigirumdom an mga nagbibiaheng puli-puli, mga turista, asin iba pang nag-aaragi na basahon an Biblia aroaldaw. An minasunod na surat, na naresibi hale sa sarong daragitang Saksi, nagpapaheling kan pagigin epektibo kan pagirumdom na ini.

“Ipinapakipag-olay ko sa saro kong kaklase kun ano an gusto kong gibohon kun makatapos ako sa haiskul. Pinonan kong sabihon an manongod sa Bethel, an opisina prinsipal kan Mga Saksi ni Jehova, asin sia naogmang marhay. Sinabi nia sa sako na sia nag-istar sa Siudad nin Nueva York sa bilog niang buhay. An saiyang pamilya bako man na relihiosong marhay, alagad kada aga kun sia minatanaw sa luwas kan bintana, igwa nin karatula na nagsasabing ‘Basahon an Tataramon nin Dios an Banal na Biblia Aroaldaw.’ Kaya aroaldaw binabasa nia an saiyang Biblia bago sia dumuman sa eskuelahan.

“Pakatapos na humale sa siudad, sia nagsabi na an hinihidaw nia sa Siudad nin Nueva York iyo na pagmata nia, dai na nia naheheling an pagirumdom na basahon an saiyang Biblia. Alagad nin huli sa karatula sa edipisyo kan Watchtower, nagin ugale na nia an pagbasa kan Biblia, kaya ipinapadagos nia an pagbasa kan Biblia aroaldaw!”

Mayo nang orog pa karahay na paagi na ponan an aldaw kisa pagbasa nin sarong kabtang kan Tataramon nin Dios! Kun gigibohon iyan, daing duda na aapresyaron nindo an mga tataramon ni apostol Pablo: “An banal na mga kasuratan . . . nakakapagpadonong sa saimo para sa kaligtasan paagi sa pagtubod mapadapit ki Cristo Jesus.”​​—2 Timoteo 3:​15-​17.