Sarong Espesyal na Okasyon—Yaon daw Kamo Duman?

SA SARONG dai malilingawan na aldaw labing 3,500 na taon na an nakaagi, ipinabuno ni Jehova Dios sa kada pamilya kan bihag na mga Israelita sa Egipto an sarong kordero o sarong kanding asin ipinawirik an dugo kaiyan sa harigi kan pinto asin sa mga balagbag sa itaas kan pinto kan saindang harong. Kan banggi man sanang iyan, an anghel nin Dios linihisan an mga harong na markado sa paaging ini alagad ginadan an panganay na mga aking lalaki sa mga harong kan gabos na Egipcio. Dangan pinatalingkas an mga Israelita. Sa anibersaryo kan pangyayaring iyan, sinelebrar kan mga Judio an Paskua.

Tolos-tolos pakaselebrar ni Jesu-Cristo kan saiyang huring Paskua kaiba kan saiyang mga apostol, pinonan nia an sarong pamanggihan na magpapagirumdom kan saiyang kagadanan bilang atang. Tinawan nia nin tinapay na daing lebadura an saiyang mga apostol asin nagsabi: “Kua, kakan kamo. Ini nangangahulogan kan sakong hawak.” Dangan tinawan nia sinda nin kopa nin arak asin nagsabi: “Inom kamo kaiyan, kamo gabos; huli ta ini nangangahulogan kan sakong ‘dugo kan tipan,’ na papaboloson manongod sa dakol para sa kapatawadan nin mga kasalan.” Nagsabi man si Jesus: “Padagos na gibohon nindo ini sa paggirumdom sa sako.” (Mateo 26:​26-28; Lucas 22:​19, 20) Kaya pinagbotan ni Jesus an saiyang mga parasunod na gibohon an pagselebrar na ini kan saiyang kagadanan.

An anibersaryo kan kagadanan ni Jesus ngonyan na taon natatagbo sa Mierkoles, Abril 19, pagkasolnop kan saldang. An Mga Saksi ni Jehova sa bilog na kinaban magtitiripon sa espesyal na bangging ini tanganing selebraron an Memorial na ini sa paagi na hinagad ni Jesus. Kamo maogmang marhay na iniimbitaran na makiiba sa samo bilang mga nagmamasid. Tabi ihapot sa mga Saksi ni Jehova sa saindong lugar an eksaktong oras asin lugar kan pagtiripon.