Kontra an mga Magurang sa Prehuwisyo nin Sarong Maestro
An sarong maestro sa elementarya sa Cassano Murge, Italia, pinapuli na may darang mga istiker an nagkapira sa saiyang mga eskuela. An mga istiker na ini, na ibubugtak sa pinto sa delantera, may notisya na: “Mga Katoliko kami. An Mga Saksi ni Jehova hinahagadan na dai tumoktok sa pintong ini.”
An nagkapira sa mga magurang kan mga eskuela, minsan ngani bakong mga Saksi ni Jehova, marigon na kinontra an gawe-gawe kan maestro. Segun sa magasin nin mga bareta na Muoviti Muoviti, an mga magurang nagreklamo na ‘an pagtao nin arog kaining mensahe sa mga aki nakakokontribwir sa saindang paghabo sa siisay man na bako nindang kapareho an pag-iisip o sa pagpuera ninda sa saro huli ta “laen” an saiyang relihion.’ An sarong magurang na nagsurat sa magasin inapod an istiker na “an banhi nin doot, an bunga kan ignoransia asin katontohan.”
Siring kan ipinaheheling kan baretang ini, rinerekonoser nin dakol na makatanosan na tawo an peligro nin pagsabwag nin mga banhi nin prehuwisyo. Iginagalang man ninda an Kristianong ministeryo na ginigibo kan Mga Saksi ni Jehova sa bilog na Italya asin sa bilog na kinaban. Taano ta dai hagadon sa mga Saksi an ‘rason para sa saindang paglaom’? Sinda magigin galagang marhay na ipakipag-olay iyan sa saindo, na ginigibo iyan na may “hararom na paggalang.”—1 Pedro 3:15.