Taano ta Dapat Magin Mapagpatawad?
“AN MGA sientista naglansar nin pagsiyasat na nagpoon na ipaheling na an kapatawadan puede talagang pakarhayon an emosyonal—asin, posibleng marhay, an pisikal—na salud,” an ibinabareta kan The Toronto Star sa Canada. Pero, naoobserbaran ni Propesor Carl Thoresen kan Unibersidad nin Stanford, E.U.A., nangengenot na parasiyasat para sa Proyekto Dapit sa Kapatawadan nin Stanford, na “kakadikit kan nakasasabot kun ano an kapatawadan asin kun paano iyan nagkakaepekto.”
An tunay na kapatawadan ibinibilang na sarong mahalagang marhay na aspekto nin Kristianismo. An bareta kan The Toronto Star tinatawan iyan nin kahulogan na “pagrekonoser na kamo pinagkasalaan, paghale sa gabos na ibinungang paghinanakit, asin sa kahurihurihi pagpaheling nin pakikidamay asin pagkamoot pa ngani sa tawong nagkasala.” Iyan dapat na ilaen sa pagkonsinte, pananarahotan, paglingaw, o pagnegar sa kasalan; ni nangangahulogan iyan na ibinubugtak giraray niato an satong sadiri sa situwasyon na kita minamaltrato. An bareta nagsasabi na an liabe sa tunay na kapatawadan iyo “an paghale kan kaanggotan asin negatibong mga saboot.”
Sinasabi kan mga parasiyasat na kaipuhan an dugang pang pag-analisar sa pisikal na mga pakinabang nin kapatawadan. Minsan siring, sinda talagang nagbabareta nin sikolohikong mga pakinabang, kaiba an “mas dikit na tension, kahaditan asin depresyon.”
An sarong nobleng dahelan para sa pagigin mapagpatawad ipinahahayag sa Efeso 4:32, na nagsasabi: “Magin maboot sa lambang saro, madinamayon sa mamomoton na paagi, na sueltong nagpapatarawadtawadan siring na an Dios man sueltong nagpatawad sa saindo paagi ki Cristo.” Kun dapit sa kapatawadan, siring man sa iba pang bagay, kita sinasadol na magin paraarog sa Dios.—Efeso 5:1
An pagsayumang magpatawad sa iba kun may basehan para sa pagkaherak puedeng magkaigwa nin maraot na epekto sa sato mismong relasyon sa Dios. Linalaoman ni Jehova na kita magpatarawadtawadan. Dangan puede kitang mamibi na patawadon nia kita.—Mateo 6:14; Marcos 11:25; 1 Juan 4:11.