An Marahay na mga Gibo Nagtatao nin Kamurawayan sa Dios
AN MGA namomoot sa Dios naghihingoang ipabanaag an espirituwal na liwanag hale sa saiyang Tataramon, an Biblia. Paagi kaini, sinusunod ninda an pagboot ni Jesus: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) An itinataram siring man an tanos na gawe-gawe puedeng magtao nin kamurawayan sa Dios.
An mga Saksi ni Jehova naghihingoang paogmahon an Dios paagi sa paggaweng kaoyon kan Biblia asin paagi sa paghihingoang tabangan an iba sa espirituwal. Ginigibo ninda iyan dawa sa kadagaan na dai pa rehistrado nin legal an saindang pampublikong ministeryo. Sa kabiserang siudad kan saro sa mga nasyon na ini, an mga Saksi naggigibo nin taonan na mga kombension na inaatenderan nin mga poon 6,000 sagkod 9,000 katawo. Para sa siring na pagtiripon, nag-arkila sinda nin mga tiriponan sa mga pasilidad na dian nagkakaigwa nin mga eksibisyon. Arog kan nakaaging mga taon, bago kan saindang kombension kan 1999, ginatos na Saksi an mahigos na naglinig sa mga pasilidad asin nag-instalar nin sound system asin rinibong tukawan.
May nakarisa sa gabos na pag-andam na ini. Naobserbaran kan mga administrador kan mga pasilidad an mga aktibidad na ini. Naheling man ninda na, minsan ngani an pinakahalangkaw na kabilangan nin nag-atender 15,666, nagin marahay an padalagan kan gabos na bagay asin an mga Saksi aregladong marhay. An mga administrador naghanga man sa sirot na marhay na paglinig pakatapos.
An mga administrador nagpaheling nin pag-apresyar sa gabos na ini paagi sa pagbugtak kan mga Saksi sa lista nin mga ipinaoorog tangani na sinda an may enot na oportunidad na arkilahon an edipisyo sa masunod na taon. Alagad an mga administrador may ginibo pa apuera kaiyan. Kan Hulyo 15, 1999, iprinesentar ninda sa komite kan kombension an premyo sa pag-apresyar. Nakaukit sa plake an mga tataramon na “an kongregasyon kan Mga Saksi ni Jehova”—bagay na dai linalaoman sa sarong nasyon na ipinangangalad an saindang gibong pagtotokdo kan Biblia.
Sa bilog na kinaban sa 2000/2001, minilyon an linalaoman na maatender sa ginatos na “Mga Paraotob kan Tataramon nin Dios” na Pandistritong Kombension kan Mga Saksi ni Jehova. Paagi sa pagigin presente, maoobserbaran mismo nindo kun paano an mga maigot na nag-ootob kan sinasabi sa Biblia nakikikabtang sa marahay na mga gibo na nagtatao nin kamurawayan sa Dios.