Diosnon na Kadonongan—Paano Iyan Ipinaheheling?

BINABASANGBASANG an kadonongan kan dukha, asin dai hinihinanyog an saiyang mga tataramon.” Paagi sa mga tataramon na ini, tinapos kan madonong na si Hadeng Salomon an estorya nin sarong hamak alagad madonong na tawo na ilinigtas sa kalaglagan an enterong siudad. Pero makamomondo, “mayo lamang nin nakagirumdom sa dukhang tawong idto.”—Eclesiastes 9:14-16.

An mga tawo may tendensiang menuson an mga tawong daing kaya, dawa may nobleng nagibo an mga dukhang ini. Nangyari ini kaidto ki Jesus. Si Isaias naghula manongod sa saiya: “Sia pinagduhagi asin isinikwal nin mga tawo, sarong lalaki na itinalaga sa mga kakologan asin sa pakamidbid nin helang.” (Isaias 53:3) Si Jesus dinuhagi kan nagkapira huli sana ta mayo sia nin prestihio o pagkaprominente arog kan mga namomoon kan saiyang kaaldawan. Pero, igwa sia nin kadonongan na orog kadakula kisa kan sa siisay man na makasalan na tawo. An mga tawo sa ginikanan na banwaan ni Jesus habong rekonoseron na an “aki kan panday” na ini nagpapaheling nin siring na kadonongan asin naggibo nin siring na makapangyarihan na mga gibo. Minsan siring, iyan sarong peligrosong sala, huli ta an pagkasaysay nagpapadagos sa pagsabi na “dai [si Jesus] naggibo duman nin dakol na makapangyarihan na gibo huli sa saindang kadaihan nin pagtubod.” Kanigoan na kapierdihan para sa mga tawong idto!—Mateo 13:54-58.

Dai ta man logod magibo an siring na sala. “An kadonongan napatutunayan na matanos paagi sa mga gibo kaiyan,” an sabi ni Jesus. An mga naggigibo kan gibohon nin Dios asin nagtatao nin kadonongan na hale sa langit namimidbid, bakong paagi sa saindang prestihio o kamugtakan sosyal, kundi paagi sa ‘marahay na bunga’ na ipinaheheling ninda—an saindang pagtubod asin mga gibo na basado sa Biblia.—Mateo 7:18-20; 11:19.