Sarong Leksion na Makukua sa Marinero

AN PAGLAYAG nin solo sa mahiwas na dagat puedeng magin biyong nakapapagal. An pamiminhod puedeng pasil na magtulod sa marinero pasiring sa punto na sia nasa peligroso nang kamugtakan, kaya sia nasasala na asin nakagigibo na nin salang mga desisyon. Sa dahelan na ini, inaapresyar nia an halaga nin angkla sa dagat. Minatogot iyan sa pagal na marinero na makapahingalo asin mabawi an kosog na dai peligrosong inaanod. Kadungan kaiyan, an angkla sa dagat pinipuersa an proa na umatubang sa doros asin mga alon asin pinapagdadanay an baroto sa pinakamarigon na posisyon kaiyan. Kun paanong an mga marinero napapaatubang sa balakid na peligro sa dagat, an mga Kristiano napapaatubang sa dayaday na pan-iimpluwensia kan kinaban na ini asin nakamamate kan pangangaipo na magpahingalo. Sa katunayan, sarong beses irinekomendar ni Jesus sa saiyang mga disipulo: “Madia, kamo mismo, na pribado, sa sarong puerang lugar asin magpahingalo kamo nin kadikit.” (Marcos 6:31) Ngonyan, an nagkapira tibaad magbiahe nin pirang semana o magduman sa ibang lugar tanganing magpahorohayahay sa katapusan kan semana kaiba kan saindang pamilya. An mga panahon na ini puedeng magin nakagiginhawa asin nakapababagsik giraray. Pero, paano ta maseseguro na kita harayo sa peligro sa espirituwal sa siring na mga panahon? Ano an puedeng magserbing espirituwal na angkla niato sa dagat na matabang sa sato na labanan na ikaanod asin magdanay na marigon?

Si Jehova buka an palad na nagtao nin probisyon na makukua niato. Iyan daing iba kundi an saiyang Banal na Tataramon, an Biblia. Paagi sa pagbasa kaiyan aroaldaw, kita puedeng magdanay na dayupot ki Jehova asin nungkang iaanod parayo sa saiya. An hatol kaiyan puedeng parigonon kita asin pangyarihon kitang makatagal sa mga sugot ni Satanas asin kan saiyang kinaban. An satong pagpadanay nin regular na programa sa pagbasa nin Biblia, dawa kun kita mayo sa satong regular na iskedyul, puedeng magserbing angkla niato sa espirituwal—Josue 1:7, 8; Colosas 2:7.

Pinagigirumdom kita kan salmista na “maogma an tawo” na “an saiyang kaogmahan yaon sa ley ni Jehova, asin sa saiyang ley sia nagbabasa sa maluya sanang tingog aldaw asin banggi.” (Salmo 1:1, 2) An pagbasa kan Tataramon nin Dios aroaldaw matao sa sato kan ‘maogmang’ resulta nin pagigin tunay na napreskohan asin napabagsik giraray, andam na magpadagos sa satong Kristianong dalan.