Kun an Dai Paggirong Nagigin Pag-aprobar

AN LIBRONG Betrayal—German Churches and the Holocaust prankang ipinaliliwanag an kabtang kan relihion sa Nazismo. “An pagsuportar sa rehimen lakop sa tahaw kan mga Kristiano,” an positibong sinasabi kan libro, “asin an dakulang mayoriya dai nakapagpahayag nin ano man na pagkontra sa paglamag sa mga Judio. An dai paggirong, sa bagay na ini, dakulaon an ihinahayag.”

Ano an nakaakit sa mga naghihingakong Kristiano sa Nazismo? An dakol, an paliwanag kan libro, naakit kan “pamamaagi [ni Hitler] na orden publiko sa sosyedad na Aleman.” Iyan nagsasabi: “Kinontra nia an pornograpiya, pagpapatotot, aborsion, homoseksuwalidad, asin an ‘kalaswaan’ kan modernong arte, asin prinemyohan nia nin mga medalyang bronse, pirak, asin bulawan an mga babae na nangaki nin apat, anom, asin walo, sa siring ineenkaminar sinda na magdanay sa saindang tradisyonal na kabtang sa harong. An pagpukaw na ini sa tradisyonal na mga pamantayan sa buhay, na inibanan nin militaristikong nasyonalismo na iinalok ni Hitler bilang simbag sa pagkapasupog kan nasyon sa Tratado sa Versailles, ginibong kaakit-akit na opsion an Nasyonal na Sosyalismo para sa dakol, sa kadaklan pa ngani, na Kristiano sa Alemania.”

An sarong grupo biyong napalaen. “An Mga Saksi ni Jehova,” an sabi kan Betrayal, “nagsayumang makikabtang sa kadahasan o sa paggamit nin puersa militar.” Dai malilikayan, ini nagbunga nin maisog na pag-atake sa sadit na grupong ini, asin dakol sa mga miembro kaini an ibinugtak sa mga kampo de konsentrasyon. Pero, an iba na naghingakong mga parasunod ni Cristo dai lamang nagprotesta. Sinabi pa kan libro: “An mga Katoliko asin Protestante sa pankagabsan nagpaheling nin orog na oposisyon kisa pakikidamay sa mga Saksi ni Jehova, asin mas pinaboran ninda an maringis na mga pamantayan sa buhay ni Hitler kisa kan sa mga Saksi na kontra sa guerra.” An saindang dai paggirong daing duda na nakadagdag sa pagmaltrato sa mga Saksi na sakop kan rehimen na Nazi.

Mantang an pagkasangkot kan mga iglesia sa politika kan Nazi padagos na nagigin gikanan nin mainit na kontrobersia, an Betrayal inaapod an Mga Saksi ni Jehova na “sarong grupong relihioso na nagsayumang aprobaran an o makikolaborar sa rehimen.”