“Sarong Halimbawa nin Pagkasararo”

IYAN an titulo nin sarong editoryal na ipinublikar sa sarong peryodiko sa Indaiatuba, São Paulo, Brazil. Siisay an nagtao kan halimbawa? “An Mga Saksi ni Jehova, na nagplanong magtogdok nin bagong ‘Kingdom Hall,’ an apod sa mga templo o auditoryum ninda, nagtatao nin positibo asin tunay na halimbawa nin kooperasyon na dai puedeng ignorohon,” an paliwanag kan parasurat.

An pagkasararo sa tahaw kan Mga Saksi ni Jehova risang-risa sa siring na mga okasyon. Huli kaini, an artikulo nagsabi: “Nakapupukaw sa boot na maheling an mga lalaki, babae, asin tinedyer na gikan sa boot na boluntaryo na nagtatarabang sa pagtogdok nin sarong lugar kun saen puede sindang magtiripon asin sumamba sa Dios.”

An Mga Saksi ni Jehova nagpaheling man nin marahay na halimbawa sa iba pang bagay. “Apuera sa pag-adal asin pamimibi, an saindang katuyohan iyo an irehabilitar an mga alkoholiko asin adikto sa droga patin itokdo sa mga tawo an paagi nin pagkasararo asin pagkamoot,” dagdag pa kan editoryal. Paano ninda nagigibo ini? Aram kan mga Saksi na an pag-adal asin pag-aplikar kan hatol kan Biblia nakakatabang sa sarong tawo na makabutas sa mga bisyo. Iyan an dahelan na nagmamaigot sindang itokdo sa iba an nanodan ninda sa Biblia. An editoryal nagkonklusyon na nasa sainda “an halimbawa na, daing duda, kaipuhan na marhay na arogon.”

An mga pagtiripon kan Mga Saksi ni Jehova bukas para sa publiko asin mayo nin pangongolekta. Mainit kamong iniimbitaran na dumalaw sa Kingdom Hall na harani sa saindo.