An Panlaog na Kagayonan Igwa nin Nagdadanay na Halaga

“IPINAPAREHO NIN SARONG HOBEN NA LALAKI AN KAGAYONAN SA BIRTUD,” AN KOMENTO NIN SARONG MAY EDAD NANG FIEL NA KRISTIANO.

Iyo, haloy nang may tendensia an tawo na magtao nin sobrang importansia sa panluwas na kagayonan, na parateng minaresulta sa pagkapasala nin paghusgar sa panlaog na mga prinsipyo sa buhay. Minsan siring, an satong Kaglalang hineheling kun ano kita sa kairairaromi, ano man an satong panluwas na itsura. Sa paaging ini sia nagtatao nin marahayon na halimbawa nin maygurang na paghusgar. Oyon sa Biblia, an Dios mismo nagsabi: “An pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.”—1 Samuel 16:7.

An Dios iyo an Gikanan nin tunay na kagayonan nin tawo, asin ihinahayag kan saiyang Tataramon na kun hinuhusgaran an tunay na merito nin sarong tawo, an espirituwal na mga kualidad an pinakamahalaga. An Biblia nagsasabi: “An pan-akit tibaad falso, asin an kagayonan tibaad basang sana; alagad an babae na natatakot ki Jehova iyo an nag-aako nin kaomawan para sa saiya man sana.” (Talinhaga 31:30) Tunay nanggad, an panluwas na kagayonan puedeng itago an panlaog na kakanosan. (Ester 1:10-12; Talinhaga 11:22) Minsan ngani an pisikal na kagayonan puedeng mawara sa pag-agi nin panahon, an panlaog na kagayonan—an mga kualidad kan puso—puedeng tumalubo asin magdanay.

Kun siring, madonong nanggad na kultibaron an mga kualidad na arog kan pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri! (Galacia 5:22, 23) Sa siring mapapasato an panlaog na kagayonan, na totoong may nagdadanay na halaga.—1 Pedro 3:3, 4.