Harani Na daw an Pagkasararo sa Relihion? — Watchtower ONLINE NA LIBRARYA

Harani Na daw an Pagkasararo sa Relihion?

“Naheheling ta an sarong mahalagang aldaw sa historya kan satong mga iglesia,” an sabi ni Christian Krause, presidente kan Pankinaban na Pederasyon Luterano. Siring man, si Papa Juan Paulo II nagtaram manongod sa “sarong makahulogan na pangyayari sa depisil na dalan para sa pagprobar na ibalik an lubos na pagkasararo sa tahaw kan mga Kristiano.”

An dahelan kan entusiastikong mga proklamasyon na ini iyo an pagpirma kan Opisyal na Pinagkaoyonan na Deklarasyon kan Oktubre 31, 1999, sa Augsburg, Alemania, na kinokompirmar an Pinag-iribang Deklarasyon sa Doktrina nin Pagtataong Katanosan. Marahay an pagkapili kan iskedyul asin lugar kan okasyon. Sinasabi na kan Oktubre 31, 1517, ipinaskil ni Martin Luther an saiyang 95 tesis sa pinto kan kastilyong simbahan sa Wittenberg, na paagi kaiyan pinoponan an Reporma Protestante. Siempre, sa Augsburg iprinesentar kan mga Luterano kan 1530 an saindang pundamental na doktrina, an Kredo nin Augsburg, na hinaboan kan Iglesia Katolika, na nagresulta sa imposibleng mahusay na iriwal sa pag-oltanan nin Protestantismo asin Katolisismo.

An Pinag-iribang Deklarasyon daw magigin sarong desididong lakdang sa paghale sa pagkabaranga kan iglesia, siring sa hinihingako? Bakong gabos na lado naglalaom nin marahay. Labing 250 teologong Protestante an puminirma nin kontrang petisyon, na nagpapatanid tumang sa pamamahala sa sainda kan Iglesia Katolika. Nairitar man an mga Protestante kan an Iglesia Katolika magdeklarar nin sarong espesyal na indulhensia para sa taon 2000, an mismong kaugalean na pinonan kan iriwal mga 500 na taon na an nakalihis. Asin huling an Kredo nin Augsburg sagkod an Katolikong pangangatanosan paagi sa Konsilyo nin Trent aplikable pa man giraray, an pagkasararo dai nanggad masegurado. An pagkabaranga asin dai pagkakaoyon sa laog nin Kakristianohan mas dakula nanggad kisa sa magigibong pagpakarhay kan pagpirma nin ano man na pinag-iribang deklarasyon. Apuera kaini, an pagkasararo sa pagtubod nagdedepende sa mga tinutubod na masarig na nakabasar sa Tataramon nin Dios, an Biblia. (Efeso 4:3-6) Imbes na paagi sa pakikipagkompromiso, an tunay na pagkasararo hale sa pakanood asin paggibo kan hinahagad sa sato nin Dios. “An gabos na banwaan, kun para sa sainda, maglalakaw an balang saro sa ngaran kan saiyang dios,” an ipinahayag kan fiel na propetang si Miqueas, “alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.”—Miqueas 4:5.

[Pasasalamat para sa pinagkuanan kan retrato sa pahina 32]