Kun Paano Ninda Napaglabanan an Impluwensia nin Kairiba
AN PAGMAWOT na akoon nakaiimpluwensia sa dakol na umarog sa kaisipan asin gawe-gawe kan saindang mga kairiba. An mga hoben an espesyalmenteng nangangaipo nin kosog tanganing magsayuma sa nakadadanyar na mga gibo, siring baga kan pagdodroga asin seksuwal na inmoralidad. Paano ninda mapaglalabanan an impluwensia nin kairiba?
Duwang daragita sa Polandia an nagsurat kasuarin pa sana: “An espiritu kan kinaban malinaw nanggad na naheheling sa kadaklan kan samong mga kairiba. Sinda nandadaya sa saindang eksaminasion sa eskuelahan, naggagamit nin malaswang mga tataramon, asin gusto nin sunod sa usong gubing asin daing kontrol, inmoral na musika. Naoogma nanggad kami na igwang mga artikulo na iinaatubang para sa samong mga hoben asin pinoprotehiran kami tumang sa impluwensia nin diskontento asin rebelyosong mga tinedyer!
“Dai kayang ikapahayag kan mga tataramon an samong pagpasalamat para sa mga artikulo sa Torrengbantayan na itinudok sa samong isip na bilang mga hoben kami kaipuhan asin inaapresyar. An konseho sa Biblia na samong inako nakatabang sa samo na giyahan nin tama an samong mga lakad tanganing makapadagos na nakapaoogma ki Jehova Dios. Kombensido kami na an fiel na paglilingkod ki Jehova an pinakamarahay na paagi nin pamumuhay.”
Iyo, an mga hoben puedeng lumaban sa impluwensia nin kairiba. Paagi sa pagpapatood kan saindang “kakayahan nin pagmansay,” an Kristianong mga hoben nakakanood na gumibo nin madonong na mga desisyon na dai nagpapabanaag kan “espiritu kan kinaban” kundi, imbes, kan “espiritu na gikan sa Dios.”—Hebreo 5:14; 1 Corinto 2:12.