“Sa Katapustapusi Aram Ko Na Kun Ano an Sakong Diperensia!”

IYAN an namatean nin sarong lalaki sa Tokyo kan nabasa nia an estorya nin buhay sa isyu kan Disyembre 1, 2000 na The Watchtower. An artikulo may titulong “You Do Not Know What Your Life Will Be Tomorrow” (sa Bicol, “Dai Nindo Naaaraman Kun Ano an Magigin Buhay Nindo sa Aga”), asin isinaysay kaiyan an eksperyensia nin sarong dating misyonero na nagkahelang nin inaapod sa medisina na manic-depressive psychosis.

An lalaking taga Tokyo nagsabi sa sarong surat na ipinadara sa mga kagpublikar kan magasin na ini: “An mga sintoma na isinabi iyo an eksaktong namamatean ko. Kaya nagpaheling ako sa sarong ospital para sa sikiyatriya asin naaraman ko na igwa ako nin manic depression. An doktor na nag-eksamin sa sako napangalas. Sia nagsabi, ‘An mga tawong may arog kaining helang bihirang magsaboot na sinda may helang.’ Natabangan akong maaraman an helang bago pa iyan maggrabeng marhay.”

Minilyon na tawo sa bilog na kinaban an nakikinabang sa laen-laen na paagi sa pagbasa kan kada isyu kan An Torrengbantayan asin an kaiba kaiyan na magasin, an Awake! Nanonompongan ninda na an mga artikulo nakapagtotokdo asin nakakokontento. An magasin na Torrengbantayan iniimprenta na ngonyan sa 141 lenguahe, asin an Awake! ipinupublikar na sa 86 na lenguahe. Kamo man maoogmang basahon An Torrengbantayan asin Awake! nin regular.