An Marahay na mga Gibo Nagpapamuraway sa Dios
PAAGI sa marahay nindang gawe-gawe asin arogan na mga gibo, an tunay na mga Kristiano nagtatao nin kamurawayan sa Dios. (1 Pedro 2:12) Ini maheheling sa nangyari sa Italia kan nakaagi pa sanang mga taon.
Kan Setyembre 1997, sarong makosog na linog an tuminama sa manlaenlaen na parte kan rehion nin Marche asin Umbria, na nakadanyar nin haros 90,000 na harong. Tolos-tolos na nagtao nin tabang an mga grupo nin mga Saksi ni Jehova sa mga kapagtubod asin sa iba pa. Nagsuplay nin mga harong na de rueda, bag na ginagamit na higdaan, kalan, dienereytor, asin iba pang mga bagay na kaipuhan. May nakarisa sa paghihingoang ini na magtao nin ayuda.
An peryodikong Il Centro nagreport: “An enot na nag-abot na may darang ayuda sa apektadong mga lugar iyo an mga Saksi ni Jehova na hale sa Roseto [sa probinsia nin Teramo] . . . Apuera sa panapanahon na pagtiripon tanganing mamibi, an mga fiel ki Jehova nagtrabaho sa praktikal na paagi, nagtatao nin tabang sa mga nagdudusa, na dai iniintindi kun ano man an relihion ninda.”
An alkalde kan Nocera Umbra, saro sa mga banwaan na naapektaran na marhay, nagsurat sa mga Saksi: “Bilog na puso asin personalmente akong nagpapasalamat sa saindo para sa tabang na itinao sa mga namamanwaan nin Nocera. Segurado ako na ipinahahayag ko an saboot kan gabos na siudadano kaiyan.” Saro pa, itinao kan Ministri nin Interior sa Congregazione Cristiana dei Testimoni di Geova (Kristianong Kongregasyon kan mga Saksi ni Jehova) an sarong sertipiko nin merito asin medalya “tanganing patotoohan an ginibo asin kahigosan sa mga aktibidad na konektado sa emerhensiang uminagi sa rehion nin Umbria asin Marche.”
Kan Oktubre 2000, sarong kapahapahamak na baha an uminagi sa rehion nin Piedmont sa amihanan na Italia. Sa giraray, an mga Saksi tolos-tolos na naghiro tanganing tumabang na magtao nin ayuda. May nakarisa man sa marahay na mga gibong ini. Tinawan sinda kan Rehion nin Piedmont nin plake para sa saindang “mahalagang marhay na pagboluntaryo bilang pagsuportar sa mga namamanwaan nin Piedmont na naapektaran kan pagbaha.”
Ininstruksionan ni Jesu-Cristo an saiyang mga disipulo: “Pasiranga an saindong liwanag sa atubangan nin mga tawo, tanganing maheling ninda an saindong marahay na mga gibo asin pamurawayon ninda an saindong Ama na nasa kalangitan.” (Mateo 5:16) Maogmang pinamumuraway kan Mga Saksi ni Jehova an Dios, bakong an sadiri ninda, paagi sa pagsagibo nin “marahay na mga gibo” na nakatatabang sa saindang kapwa sa espirituwal asin sa iba pang mga paagi.