Paano Kamo Makaliligtas sa Katapusan kan Kinaban na Ini?

ILINALADAWAN kan Biblia an katapusan kaining presenteng sistema nin mga bagay bilang “aldaw nin kabangisan, aldaw nin kasakitan asin nin panangis, aldaw nin bagyo asin nin pangaba, aldaw nin kadikloman asin nin paglumlom, aldaw nin pagdagom asin nin pagdiklom.” (Sofonias 1:15) Seguradong bakong arog kaini an aldaw na normal nang aantisiparon nindo! Pero, sinadol ni apostol Pedro an mga kapwa nia Kristiano na ‘maghalat asin papagdadanayon na harani sa isip an presensia kan aldaw ni Jehova, na paagi kaiyan an kalangitan mantang nagkakalayo matutunaw asin an mga elemento mantang labi-labi kainit matutunaw! Alagad igwa nin bagong kalangitan asin sarong bagong daga na satong hinahalat oyon sa saiyang panuga, asin sa mga ini magdadanay an katanosan.’​—2 Pedro 3:​12, 13.

Dai nagtataram digdi si Pedro manongod sa paglaglag kan literal na kalangitan asin daga. An “kalangitan” asin “daga” na sinasambit ni Pedro sa kontekstong ini simbolo kan presenteng maraot na mga gobyerno nin tawo asin nin maraot na sosyedad nin tawo. Dai lalaglagon kan “aldaw ni Jehova” an daga mismo kundi ‘paparaon kaiyan an mga parakasala sa daga.’ (Isaias 13:9) Para sa mga “nag-aaragagha asin nag-aaragrangay huli sa gabos na makauuyam nin makuring bagay” na ginigibo sa maraot na sosyedad nin tawo ngonyan, an aldaw ni Jehova kun siring magigin aldaw nin pagliligtas.​—Ezequiel 9:4.

Kun siring, paano makaliligtas an siisay man sa “dakula asin makangingirhat na aldaw ni Jehova”? An “tataramon ni Jehova” na ihinayag sa saro kan saiyang mga propeta an nagsisimbag sa hapot na iyan: “Mangyayari na an gabos na mag-apod sa ngaran ni Jehova makaliligtas.” (Joel 1:1; 2:​31, 32) An Mga Saksi ni Jehova maoogmang tabangan kamong manodan kun ano an boot sabihon kan pag-apod sa ngaran ni Jehova.