Maninigo daw na an Pagtubod Ibasar sa Pangangatanosan?
“Kadakol kan ‘relihiosong’ tawo na kaya sana nagin relihioso ta habo nang mag-isip,” an isinurat kan dekano sa sarong seminaryo sa teolohiya sa Estados Unidos. “Basta gusto nindang tubodon an gabos na bagay ‘dawa mayo nin prueba,’” an idinugang nia.
IPINARIRISA kaini na an kadaklan na tawo na naghihingakong may relihiosong pagtubod dai pinag-iisipan kun taano ta tinutubod ninda iyan o kun baga an saindang tinutubod may rasonableng basehan. Bakong makangangalas na habong pag-olayan nin dakol an manongod sa relihion.
Makamomondo, an mga kaugalean na arog kan paggamit nin relihiosong mga imahen asin pag-otro nin tinuom na mga pamibi nagpapadesganar sa pangangatanosan. An mga kaugalean na ini, kaiba an makangangalas na arkitektura, maadornong de kolor na mga bintanang salming, asin nakaaakit na musika, iyo sana an mga bagay na minakompuesto kan relihion nin minilyon na tawo. Minsan ngani naghihingako an nagkapirang iglesia na an saindang pagtubod basado sa Biblia, an saindang mensahe na ‘tumubod ki Jesus asin kamo maliligtas’ nagpapadesganar sa seryosong pag-adal sa Biblia. An iba pa naghuhulit nin ebanghelyo para sa reporma sosyal o para sa politika. Ano an resulta kan gabos na ini?
May labot sa situwasyon sa Amerika del Norte, an sarong parasurat sa relihion nagsabi: “An Kristianismo . . . minalataw na paimbabaw sana, [asin] an mga parasunod kaiyan dai naedukar manongod sa pagtubod.” An sarong parasurbey nagsabi pa ngani na an Estados Unidos “sarong nasyon nin mga mangmang sa Biblia.” Tanganing magin imparsial, an mga komentong ini totoo man sa iba pang nasyon na nangingibabaw an Kristianismo daa. An dakol na relihion na bakong Kristiano nagpapadesganar man sa pangangatanosan asin imbes an idinodoon iyo an mga kantada, ritualistikong mga pag-arang, asin manlaenlaen na porma nin paghorophorop na kalabot an mistisismo, imbes na an may lohiko, nakatatabang na pag-iisip.
Pero, sa saindang pangaroaldaw na buhay, an mga tawo man sanang iyan na dai pinag-iisipan an pagkaeksakto o pagigin totoo kan saindang relihiosong mga pagtubod parateng maingat na marhay na pinag-iisipan an ibang mga bagay. Bako daw na palaen para sa saindo na an sarong tawo na nagsisiyasat na marhay tangani sanang bumakal nin kotse —na maabot an aldaw mapapasa tambakan man sana—magsabi manongod sa saiyang relihion, ‘Kun iyan tama na sa sakong mga magurang, iyan tama na man sa sako’?
Kun talagang interesado kitang paogmahon an Dios, bako daw na maninigo niatong estudyaran nin seryoso an pagigin tama kan satong tinutubod manongod sa saiya? Si apostol Pablo nagtaram manongod sa nagkapirang relihiosong tawo kan kaaldawan nia na may “kaigotan para sa Dios; alagad bakong oyon sa tamang kaaraman.” (Roma 10:2) An mga siring kaiyan puedeng ikomparar sa sarong tangdanan na parapinta na mahigos na nagpipinta sa sarong harong alagad salang kolor nin pinta an ginamit huli ta dai nia dinangog an mga instruksion kan kagsadiri. Tibaad naogma an parapinta sa saiyang ginibo, alagad aakoon daw iyan kan kagsadiri?
Ano an inaako nin Dios mapadapit sa tunay na pagsamba? An Biblia nagsisimbag: “Ini marahay asin inaako sa pagheling kan satong Paraligtas, an Dios, na an kabotan iyo na an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:3, 4) An nagkapira tibaad magsaboot na imposibleng manompongan an siring na kaaraman sa tahaw kan kadakol na relihion ngonyan. Alagad isipa—kun kabotan nin Dios na an mga tawo makaabot sa tamang kaaraman sa katotoohan, itatago daw nia iyan sa sainda? Dai oyon sa Biblia, na nagsasabi: “Kun hanapon mo [an Dios], mapakua sia sa saimo.”—1 Cronica 28:9.
Paano ipinapamidbid nin Dios an saiyang sadiri sa mga sinserong naghahanap sa saiya? Sisimbagon iyan sa sunod na artikulo.