Mga Paghihingoa na Nagpapaoswag sa Marahay na mga Pamantayan sa Moral
Sa huring kabtang kan 2001, nadangog kan mga naghihinanyog sa nasyonal na brodkast kan Radyo Mozambique an anunsiong ini:
“Binisita kan presidente kan Republika an mga pasilidad sa sangang opisina kan Mga Saksi ni Jehova sa Maputo. Inenkaminar nia an relihiosong kongregasyon na ini na dugangan an saindang mga paghihingoa sa pagpaoswag kan marahay na mga pamantayan sa moral nin mga pamilya asin sa pag-edukar sa mga nasa edad na paagi sa saindang mga programa nin klase para sa pagbasa asin pagsurat. Mga 10,000 katawo na an nakinabang sa mga programang ini. Segun ki Presidente Chissano, maninigong omawon an mga programang arog kaini, huli ta mahalaga ining kontribusyon sa sosyedad sa pagresolber sa mga problema sa edukasyon na inaatubang sagkod ngonyan kan nasyon na ini.”
An anunsiong ini nagpadagos paagi sa minasunod na irinekord na kabtang kan tataramon kan presidente: “Nakaparirigon na marhay sa boot na maheling niato an interes nin dakol na tawo na makanood na magbasa asin magsurat. Ipinaheheling kaini sato na an ordinaryong mga siudadano matabang sato na lumangkaw an proporsion na ini kan mga tataong bumasa asin sumurat. Kun siring, gusto ko sanang enkaminaron an Mga Saksi ni Jehova na dugangan an saindang mga programa sa klase para sa pagbasa asin pagsurat, sa ano man na lenguahe. An talagang mahalaga iyo na an mga tawo tataong bumasa asin sumurat saka mas madali sindang makakomunikar asin sa ngapit orog na makakapartisipar sa edukasyon.”
An Mga Saksi ni Jehova sa Mozambique igwa nin mga klase para sa pagbasa asin pagsurat sa 850 lugar sa bilog na nasyon tanganing mabasa mismo kan mga tawo an Tataramon nin Dios. Dugang pa, pinamamayohan ninda an mga 50,000 na daing bayad na pag-adal sa Biblia kada semana. An gabos na ini kabtang kan pambilog na kinaban na programa nin edukasyon sa Biblia na nakakaabot na ngonyan sa 235 kadagaan. (Mateo 24:14) Puede man kamong makinabang sa programang ini. Tabi dai mag-alangan na kontakon an mga Saksi ni Jehova sa saindong lugar.