Pagtao na Makolog sa Bulsa

“PUEDE nindo akong apodon na parapakilimos; dai ako masentir. Nakikilimos ako para ki Jesus.” An makahulogan na mga tataramon na iyan nin sarong ministrong Protestante nagdodoon kan kontrobersiang nakasentro sa paghanap nin pondo para sa relihion. An establisadong mga relihion garo baga nakapagdadanay sana kun may darudakulang pinansial na suporta. Kaipuhan na bayadan an mga sueldo, itogdok asin manteneron an mga templo, sustentohan an mga kampanya sa pag-ebanghelyo. Paano daw makukua an kinakaipuhan na kuarta?

Para sa dakol na iglesia, an simbag iyo an tinagba.a “An pagtao nin tinagba iyo an paagi nin Dios sa pagsustento sa Saiyang kahadean digdi sa daga,” an paghingako kan ebanghelista na si Norman Robertson. “Iyan an Saiyang sistema nin ekonomiya na nagpapangyaring ikahulit an Ebanghelyo.” Dai nag-aalangan na ipagirumdom sa saiyang mga parasunod an saindang responsibilidad na magtao, may pagdodoon niang sinabi: ‘An pagtao nin tinagba bakong sarong bagay na ginigibo nindo huling kaya nindo. Iyan sarong akto nin pagkuyog. An dai pagtao nin tinagba sarong malinaw na pagbalga sa mga togon nin Dios. Iyan pagdispalko.’​​—Tithing​​—God’s Financial Plan.

Posibleng marhay na maoyon kamo na an pagtao maninigo na magin kabtang kan Kristianong pagsamba. Minsan siring, nakapupurisaw daw, tibaad nakaaanggot pa ngani, para sa saindo an daing ontok na paghagad nin kuarta? Sinasahotan kan sarong teologong taga Brazil na si Inácio Strieder an mga iglesia na ginagamit na remedyo an pagtao nin tinagba sa “pagresolber sa saindang institusyonal na mga problema” asin inaapod an arog kaiyan na mga gibo na “ilegal, mapan-abuso, asin sarong teolohikong pagrayo sa tamang dalan.” An resulta kaiyan, an sabi nia, iyo na an “mga mayong trabaho, babaeng balo, iskuater, asin an mga dai kayang mag-isip nin toltol nagsasaboot na liningawan na sinda nin Dios asin obligado sindang magtao nin sobra-sobra sa ‘parahulit’ kaya nagugutom an sainda mismong pamilya.”

Tibaad mag-isip-isip kamo: ‘An mga iglesia daw na nagpapaotob sa pagtao nin tinagba iinaaplikar nin tama an Kasuratan? O puede daw na kinakasangkapan nin mga relihion an pagkatakot sa Dios tanganing kuartahan an aripompon? Totoo daw na hinahagad sato nin Dios an pagtao na makolog sa bulsa, arog kan sinasabi nin iba?’

[Nota sa Ibaba]