Ginirumdom an mga Saksi ni Jehova na Ginadan

KAN Marso 7, 2002, sarong plake nin girumdoman an ihinayag sa banwaan nin Körmend sa solnopan na Hungaria. Ginirumdom dian an kagadanan kan tolong Saksi ni Jehova na ginadan kan mga Nazi kan 1945.

An plake ikinabit sa lanob kan presenteng panahon na kuartel heneral kan mga bombero sa Hunyadi Road, kun saen ginibo an mga paggadan na hayag sa publiko. An plake idinedikar bilang paggirumdom sa ‘mga Kristianong ginadan bilang habong magsoldados huli sa konsensia kan Marso 1945. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, mga Saksi ni Jehova.’

Ginibo an paggadan duwang bulan na sana bago matapos an Guerra Mundial II. Taano ta ginadan an mga Kristianong ini? Ipinaliliwanag kan peryodiko sa Hungaria na Vas Népe: “Pagkatukaw ni Hitler sa kapangyarihan sa Alemania, bako sanang an mga Judio kundi siring man an mga miembro kan Mga Saksi ni Jehova an punteriya kan paglamag asin padusa, kampo de konsentrasyon asin paggadan kun dai ninda dedeharan an saindang relihiosong kombiksion. . . . Kan Marso 1945, nangibabaw an grabeng takot sa solnopan na parte kan Hungaria. . . . Kabtang kan grabeng takot na ini an pagdeportar asin paggadan sa mga miembro kan Mga Saksi ni Jehova.”

An programa may labot sa plake binanga sa duwang kabtang. An enot ginibo sa teatro nin Batthyány Castle, na kabale sa mga nagtaram si Propesor Szabolcs Szita, na pamayo kan Holocaust Documentation Center sa Budapest; si László Donáth, miembro kan Parliament’s Committee for Human Rights, Minority and Religious Affairs; asin si Kálmán Komjáthy, na nakaheling mismo kan mga paggadan na iyo na ngonyan an historyador kan banwaan. An labing 500 katawong presente naglakaw pasiring sa ibong na lado kan banwaan para sa ikaduwang kabtang kan programa​—an paghayag kan plake na ginibo ni Alkalde József Honfi kan Körmend.

Sa saiyang surat nin pamamaaram, sinadol ni Ján Žondor (János Zsondor) an saiyang Kristianong mga tugang na lalaki asin babae na dai magmondo. Sia nagsurat: “Nasa isip ko pa an mga tataramon ni Juan na manonompongan sa Kapahayagan 2:10: ‘Patunayan mo na ika fiel sagkod sa kagadanan.’ . . . Sabihi an mga nabayaan ko na dai magmondo, ta ako magagadan huli sa katotoohan asin bakong bilang kriminal.”

[Ritrato sa pahina 32]

Bertalan Szabó

[Ritrato sa pahina 32]

Antal Hőnisch

[Ritrato sa pahina 32]

Ján Žondor