Namemeligro an Seguridad Asin Pagkakontento sa Trabaho
“AN DERETSONG magtrabaho” kaipuhan kan gabos na tawo, oyon sa Unibersal na Deklarasyon kan mga Deretso nin Tawo, na ginibo kan Naciones Unidas. Minsan siring, bakong pirmeng garantisado an deretsong iyan. An seguridad sa trabaho minadepende sa dakol na bagay—magpoon sa kamugtakan kan lokal na mga ekonomiya sagkod sa situwasyon kan komersio sa bilog na globo. Minsan siring, kun an empleyo mawara o mameligro, sa parate minasunod an mga demonstrasyon, pagkariribok, asin pagwelga. Pipira sanang nasyon an dai apektado. Dawa an terminong “trabaho,” sabi nin sarong parasurat, “poon pa kaidto, sarong termino na nagpapalaad nin makosog na emosyon.”
An trabaho mahalaga sa sato huli sa dakol na dahelan. Apuera sa pagtao sato nin entrada, nakatatabang iyan sa satong mental asin emosyonal na ikararahay. Pinaninigoan nin trabaho an kamawotan nin tawo na magin mabungang miembro nin sosyedad asin magkaigwa nin katuyohan an buhay. Pinatatalubo man kaiyan sa sato an paggalang sa sadiri. Huli kaini, dawa an mga may bastante nang kuarta para sa saindang mga pangangaipo o puede nang magretiro mas sunong padagos na magtrabaho. Iyo, mahalagang marhay an trabaho kaya an kadaihan kaiyan pinoponan sa parate nin seryosong mga problema sa sosyedad.
Sa ibong na lado, may mga igwa nin trabaho alagad napapaatubang sa grabeng tension sa trabaho kaya nawawara na an pagkakontento ninda sa trabaho. Halimbawa, huli sa labi-labing kompetensia sa komersio ngonyan, nagdadakol an mga kompanya na iniinaan an saindang mga tawohan tanganing mainaan an mga gastos. Ini nagtatao nin dugang na responsibilidad sa natadang mga empleyado, na huli kaini kaipuhan na pasanon an ekstrang trabaho.
An modernong teknolohiya, na dapat kutanang magpangyaring magin mas pasil an buhay asin mas episiente an trabaho, tibaad nakadugang sa tension sa pinagtatrabawohan. Halimbawa, itinotogot kan mga komputer, fax machine, asin Internet na madara kan mga tawo sa harong an saindang trabaho pagkatapos nin mga oras nin pagtrabaho, na huli kaini dai na maheling an kalaenan kan harong asin opisina. An sarong trabahador nagsasaboot na an pager asin cell phone kan saiyang kompanya garo dai naheheling na pangakod, na an among nia an yaon sa ibong na poro kan gakod.
An kinatatakotan nin dakol na gurang sa marikas na nagbabagong kamugtakan niato sa ekonomiya asin trabaho iyo na mamansayon sindang laos na dawa bago pa totoong mangyari iyan. Mapadapit digdi, an dating Komisyonado kan mga Deretso nin Tawo na si Chris Sidoti nagsabi: “Garo baga nagkakaigwa nin pagparareyo na apuera sana kun ika mayo pang 40 anyos, dai mo makakaya an paggamit nin mga komputer asin bagong teknolohiya.” Huli kaini, dakol na mahigos na trabahador na dati minamansay na nasa kabagsikan nin buhay an ibinibilang ngonyan na gurang nang marhay tanganing mapakinabangan. Kanigoan kamakamomondo!
Siempre, an dating tamang ugale sa trabaho asin kaimbodan sa kompanya nagrurong marhay sa nakaagi pa sanang mga taon. “Kun sinisisante kan mga korporasyon an mga tawohan ninda sa kadikit na pagbago kan bakalan nin aksiones, an kaimbodan sa korporasyon magigin bagay na nakalihis na,” an sabi kan magasin na Pranses na Libération. “Siempre, kaipuhan mong magtrabaho, alagad para sa sadiri mo, bakong para sa kompanya.”
Sa ibong kan nagdadakulang problemang ini, an pundamental na pangangaipo nin tawo na magtrabaho nagpapadagos. Kaya sa marikas na nagbabagong mga panahon niato, paano kukultibaron nin saro an timbang na pagmansay sa sekular na trabaho asin, kadungan kaiyan, mapagdadanay an pakamate nin seguridad asin pagkakontento sa trabaho?
[Ritrato sa pahina 3]
An modernong teknolohiya tibaad nakadugang kan tension sa pinagtatrabawohan