“Mayo Akong Gayong Aram Manongod sa Dios”

“SA NAKAAGING taon, nagdadalaw sako an mga Saksi ni Jehova asin ihinihiras an marahayon na bareta manongod sa Kahadean nin Dios. Ako Katoliko sa laog nin walong taon, alagad mayo akong gayong aram manongod sa Dios. Sa sangtaon sanang ini, dakol akong nanodan,” an isinurat nin sarong lalaki na nag-iistar sa Kerala, India. “Naoogma akong marhay na maaraman na An Torrengbantayan ipinupublikar sa 139 [ngonyan 146 na] lenguahe,” an idinugang nia. “Makangangalas na an mga tawo hale sa gabos na grupo nin lenguahe nakaaaram na kan mensahe manongod sa Dios.”

Maski dakol na pilosopo an naghihingako na imposibleng mamidbid an Dios, malinaw na sinabi ni apostol Pablo na posible ini. Kinakaolay an sarong grupo nin mga taga Atenas, na an nagkapira sainda nagsasamba sa sarong altar na idinusay sa “Dios na Dai Midbid,” si Pablo nagsabi: “An sa daing pakaaram tinatawan nindo nin diosnon na debosyon, iyo ini an ibinabareta ko sa saindo. An Dios na naggibo kan kinaban asin kan gabos na yaon dian . . . nagtatao sa gabos nin buhay asin hinangos patin gabos na bagay. Asin ginibo nia hale sa sarong tawo an gabos na nasyon kan mga tawo, tanganing mag-erok sa ibabaw kan bilog na daga.”—Gibo 17:23-26.

Sinadol ni Pablo an mga nagdadangog sa saiya na maghingoang mamidbid an Kaglalang, huli ta “sia bakong harayo sa lambang saro sa sato.” (Gibo 17:27) An Mga Saksi ni Jehova maoogmang tabangan kamo na mamidbid an tunay na Dios asin maaraman an saiyang nakaaakit na mga kualidad.