An Huring Pamanggihan—Ano daw Iyan?

ANO daw an minasabong sa isip nindo kun nadadangog nindo an ekspresyon na “an huring pamanggihan”? Maiisip nin dakol an hinahangaan na marhay na ipininta sa Milano, Italia, kan pintor na si Leonardo da Vinci (1452-​1519). An totoo iyo na an Huring Pamanggihan nagin popular na tema para sa mga pintor, parasurat, asin musikero sa nag-aging mga siglo.

Pero, ano an Huring Pamanggihan, asin ano an kahulogan kaiyan para sa mga tawong nabubuhay sa ika-21 siglo? Sasabihon saindo kan mga ensiklopedya asin diksionaryo na an Huring Pamanggihan, na inaapod man na an Pamanggihan nin Kagurangnan, iyo an pamanggihan ni Jesu-Cristo kaiba an saiyang mga apostol kan banggi bago an saiyang kagadanan bilang atang. Mantang iyan an huring pamanggihan ni Jesus kaiba an fiel niang mga parasunod, sa parate inaapod iyan na an Huring Pamanggihan. Asin mantang inestablisar iyan kan Kagurangnan na Jesu-Cristo mismo, angay iyan na apodon na Pamanggihan nin Kagurangnan.

Sa nag-aging mga siglo, dakol an nagsakripisyo kan saindang buhay para sa ibinibilang ninda na mahalagang causa. An nagkapira sa mga pagkagadan na ini pinakinabangan kan nagkapirang tawo sa laog nin sarong peryodo nin panahon. Pero kun ikokomparar, mayo sa mga mapagsakripisyong pagkagadan na ini, gurano man iyan kaomaw-omaw, an makakapareho nanggad sa kahulogan kan kagadanan ni Jesu-Cristo. Apuera dian, mayo nin pagkagadan sa maribok na kasaysayan nin katawohan an posibleng magkaigwa nin mahiwason na epekto. Taano?

Tanganing masimbag an hapot na iyan asin matabangan kamo na maaraman kun ano an kahulogan para saindo kan Pamanggihan nin Kagurangnan, iniimbitaran niamo kamo na basahon an masunod na artikulo.