Anong Klaseng Ngaran an Ginigibo Nindo Para sa Saindong Sadiri?
NAKABASA na daw kamo nin paisi sa pagkagadan sa saindong lokal na diaryo o nakaheling na daw kamo nin halawigon na report manongod sa buhay asin mga nagibo nin sarong nagadan na tawo? Hinapot daw nindo an saindong sadiri, ‘Ano daw an sasabihon kan mga tawo manongod sako?’ Pira daw an nag-iisip lamang kun paano sinda magigirumdoman pagkagadan ninda? Sa siring, ini an prangkang mga hapot: Ano daw an sasabihon manongod sa saindo ngonyan kun nagadan kamo kasuodma? Anong klaseng reputasyon an ginigibo nindo para sa saindong sadiri? Paano nindo gustong magirumdoman kamo kan mga nakakamidbid sa saindo asin nin Dios?
An madonong na kagsurat kan libro sa Biblia na Eclesiastes nagsabi: “An ngaran mas marahay kisa marahay na lana, asin an aldaw nin pagkagadan kisa aldaw nin pagkamundag.” (Eclesiastes 7:1) Taano an aldaw nin pagkagadan nin saro ta magigin mas marahay kisa aldaw nin pagkamundag nin saro? Huli ta sa pagkamundag an sarong tawo mayo pang naestablisar na reputasyon. An saiyang personal na rekord biyo pang daing laog. An saiyang pamumuhay maresulta sa pagkaigwa nia nin magsalang marahay o maraot na reputasyon. Para sa mga nakagibo na nin marahay na ngaran sa nag-aging mga taon, an aldaw nin pagkagadan tunay nanggad na mas marahay sa bagay na iyan kisa aldaw nin pagkamundag.
Kaya igwa kita nin mapagpipilian. Sa katunayan, aroaldaw dakol kitang mga pagpili na iyo an magdedeterminar kan satong reputasyon sa aldaw na kita magadan, nangorogna kun paano kita magigirumdoman nin Dios. Huli kaini, an iyo man sanang madonong na Hebreo nagsurat: “An pakagirumdom sa matanos may natatagamang bendisyon, alagad ta an mismong ngaran kan mga maraot malalapa.” (Talinhaga 10:7) An magirumdoman nin Dios para sa bendisyon—kanigoan na pribilehio!
Kun kita madonong, an satong obheto iyo an paogmahon an Dios paagi sa pamumuhay na kaoyon kan mga pamantayan nia. Nangangahulogan iyan nin pagsunod sa pundamental na mga prinsipyo na ipinahayag ni Cristo: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakalalabi sa gabos asin enot na togon. An ikaduwa, na arog kaini, iyo ini, ‘Kamotan mo an saimong kapwa nin siring sa saimo man sana.’ Sa duwang togon na ini nasasarig an bilog na Ley, asin an Mga Propeta.”—Mateo 22:37-40.
An nagkapira nagigirumdoman bilang mga pilantropo, humanitaryo, parasuportar sa mga deretso sibil, o huli sa mga nagibo ninda sa komersio, siensia, medisina, o iba pang aktibidad. Pero, paano nindo gustong magirumdoman kamo?
Ipinahayag kan Eskoses na poetang si Robert Burns (1759-96) an pagmawot na may sarong makapangyarihan na matao sa sato kan regalo na maheling kun ano an pagheling sa sato kan iba. Puede daw nindong helingon an saindong sadiri sa makatanosan na paagi asin magsabing igwa kamo nin marahay na reputasyon sa ibang tawo asin sa Dios? Sa katapustapusi, an satong relasyon sa iba an seguradong mas mahalaga kisa ano man na tibaad panmadalian na mga nagibo ta sa kinaban nin isport o komersio. Kun siring, ini an hapot: Paanong an satong pagtratar sa iba—an satong pakikipag-olay, an satong ugale, an hiro kan satong hawak—nakaaapektar sa sainda? An pagheling daw ninda sa sato madaling dolokon o daing labot? Maboot o maringis? Madaling makibagay o estrikto? Mamomoton asin maheherakon o indiperente asin impersonal? Sarong mapanlaglag na kritiko o sarong nakatatabang na parahatol? Siyasaton niato an nagkapirang halimbawa kan nakaagi asin sa presenteng mga panahon tanganing maheling kun ano an manonodan niato.
[Ritrato sa pahina 3]
Si Robert Burns nagmawot na may sarong makapangyarihan na matao sa sato kan regalo na maheling kun ano an pagheling sa sato kan iba
[Credit Line]
Hale sa librong A History of England