An Pagmansay nin Dios sa mga Gadan

AN PAGKAGADAN nin sarong namomotan talagang nakamomondo. An pakamate na may kulang, an kapungawan, asin an pakamate nin kawaran dai kayang sokolon. An pagkagadan nin namomotan puedeng magpamate sa saro na sia daing maginibo, ta gurano man an kayamanan, kapangyarihan, o impluwensia na tibaad igwa sia, mayo nin siisay man ngonyan sa daga an makapababalik kan buhay nin nagadan.

Minsan siring, laen man an pagmansay kan satong Kaglalang. Mantang sia an nagporma kan enot na tawo hale sa kabokabo kan daga, kaya man nia na lalangon liwat an sarong gadan na tawo. Sa dahelan na ini, puedeng mansayon nin Dios an mga gadan na garo man sana sinda buhay. Manongod sa fiel na mga lingkod kan suanoy na nagadan na, sinabi ni Jesus: “Sinda gabos buhay sa punto de vista [nin Dios].”​—Lucas 20:​38, nota sa ibaba.

Mantang nasa daga, tinawan nin kapangyarihan si Jesus na magbuhay liwat kan mga gadan. (Juan 5:21) Huli kaini, kapareho sa saiyang Ama an saiyang pagmansay sa mga nagadan na fiel. Halimbawa, kan magadan an saiyang katood na si Lazaro, sinabihan ni Jesus an saiyang mga disipulo: “Ako maduman tanganing pukawon sia sa pagkatorog.” (Juan 11:11) Sa punto de vista nin tawo, gadan si Lazaro, alagad ki Jehova asin Jesus, nagtotorog si Lazaro.

Sa irarom kan pamamahala ni Jesus sa Kahadean, magkakaigwa nin “pagkabuhay liwat an mga matanos sagkod an mga bakong matanos.” (Gibo 24:15) Pag-abot nin panahon, an mga binuhay liwat mag-aako nin pagtotokdo nin Dios asin igwa kan paglaom na mabuhay na daing katapusan digdi sa daga.​—Juan 5:​28, 29.

Iyo, an pagkagadan nin sarong namomotan puedeng magin dahelan nin grabeng kasakitan asin kapungawan, na puedeng maglawig nin dakol na taon. Minsan siring, sa pagkaigwa kan kaparehong punto de vista nin Dios sa mga gadan tinatawan kita nin dakulang karangahan asin pinapano kita nin paglaom.​—2 Corinto 1:​3, 4.