Sarong Estorya na Nakaiinspirar nin Pagtubod Asin Kosog nin Boot—Mga Saksi ni Jehova sa Ucrania

KUN paanong an mga Kristiano kan enot na siglo nakaeksperyensia nin paglamag, iyo man an banwaan nin Dios ngonyan. (Mateo 10:22; Juan 15:20) Sa pira sanang lugar na an paglamag nagin mas haloy o grabe kisa kan sa Ucrania, kun saen an gibohon na paghuhulit kan Kahadean prohibido sa laog nin 52 na taon.

Isinaysay sa 2002 Yearbook of Jehovah’s Witnesses an estorya kan banwaan nin Dios sa nasyon na iyan. Iyan estorya nin pagtubod, kosog nin boot, asin karigonan sa atubangan nin grabeng kasakitan. An minasunod iyo an nagkapirang komento nin pag-apresyar na naresibi kan sangang opisina kan Mga Saksi ni Jehova sa Ucrania:

“Natapos ko nang basahon an 2002 Yearbook. Dai ko mapogolan na mapahibi mantang binabasa an manongod sa aktibidad nindo sa Ucrania. Boot kong ipaaram sa saindo kun gurano kadakulang pagparigon sa boot an naako ko sa maigot nindong halimbawa asin makosog na pagtubod. Ipinag-oorgolyo ko na yaon ako sa iyo man sanang espirituwal na pamilya na kinabibilangan nindo. Nagpapasalamat ako gikan sa kairairaromi kan sakong puso!”​—Andrée, Pransia.

“Dai ko ikapaliwanag kun gurano kadakula an sakong pagpasalamat sa saindo asin ki Jehova para sa 2002 Yearbook. Nagbobolos an sakong mga luha mantang binabasa ko an dakol na eksperyensia kan mga tugang na ginamit an pinakamarahay na mga taon kan saindang buhay sa mga bilanggoan asin kampo de konsentrasyon. Hinahangaan ko an saindang kosog nin boot. Maski 27 taon na akong Saksi, may manonodan pa man giraray ako sa mga tugang na lalaki asin babaeng idto. Pinakosog ninda an pagtubod ko sa satong langitnon na Ama, si Jehova.”​—Vera, dating Yugoslavia.

“Isinusurat ko ini na may kagayagayahan huli sa marahay na halimbawa nindo nin pakatagal asin pagigin fiel durante kan mga taon na iyan nin pagtumang. An lubos na pagsarig nindo ki Jehova asin an determinasyon nindo na magdanay na fiel nagtao saindo nin onra. Dugang pa, an saindong kapakumbabaan sa atubangan nin mga pagbalo nagpakosog sa sakong kombiksion na dai binabayaan ni Jehova an saiyang banwaan. Huli sa marahay na halimbawa nindo nin kosog nin boot, karigonan, asin pagmamaigot, maaako niamo nin mas kalmado an samong saradit na problema.”​—Tuteirihia, Polinesia nin Pransia.

“Pakatapos na mabasa an Yearbook, kaipuhan kong sumurat saindo. Napahirong marhay an sakong boot kan gabos na magagayon na eksperyensia. Ipinag-oorgolyo ko na magin miembro kan siring na maimbod, nagkakasararong organisasyon, na pinangengenotan nin sarong mamomoton, may pagmakolog na Ama, na nagtatao sa sato nin kosog sa tamang panahon. Namondo ako na kadakol na marahay na lingkod ni Jehova an nagdusa nin grabe asin nagadan pa ngani. Alagad nakamate man ako nin kagayagayahan huli ta bilang resulta kan kosog nin boot asin kaigotan ninda, kadakol na tawo an nakanood kan katotoohan asin nakamidbid sa satong mamomoton na Ama.”​—Colette, Netherlands.

“Kaipuhan na sumurat kaming mag-agom sa saindo tanganing sabihon na an samong puso napahiro mantang binabasa niamo sa Yearbook an pagkasaysay manongod sa Ucrania. Kamo na fiel na mga tugang nagpaheling nin marahayon na halimbawa nin pakatagal sa irarom nin halawig asin grabeng kasakitan. Kaoyon kan mga tataramon sa Talinhaga 27:​11, siertong kanigoan an kaogmahan ni Jehova na maaraman na kadakol na fiel na tugang sa Ucrania an nagdanay na may dai nababaring integridad sa ibong kan gabos na maraot na ginibo kan Diablo.”​—Alan, Australia.

“Napaluha ako kan mabasa ko an manongod sa mga tugang sa Ucrania. Kadakol kan tinios ninda​—dakol na taon nin pagkabilanggo, mga padusa, pan-aapi, asin pagkasuway sa pamilya. Gusto kong isabi sa gabos na tugang na yaon pa man giraray sa mga kongregasyon nindo na namomotan asin iginagalang ko sindang marhay. Naoogma nanggad akong marhay sa kosog nin boot asin karigonan ninda. Aram ko an gikanan kan saindang kosog, an espiritu ni Jehova. Si Jehova harani sa sato, asin gusto niang tabangan kita.”​—Sergei, Rusya.

“Binasa ko an 2002 Yearbook, asin naghibi ako. Pinag-oolayan kan dakol na tugang sa samong kongregasyon an manongod saindo. Kamo tunay na mahal na marhay. Naoogma akong marhay na magin kabtang kan siring kadakulang espirituwal na pamilya.”​—Yeunhee, Timog na Korea.

“Napahiro akong marhay kan saindong rekord nin pagtubod, pakatagal, asin masarig na pagkamoot ki Jehova asin sa saiyang Kahadean. Kun beses dai niato pinahahalagahan an katalingkasan na nakakamtan niato asin an abundang espirituwal na kakanon na itinatao ni Jehova sa sato. Minsan siring, bakong arog kaini an kaso nindo. An saindong halimbawa nin pagtubod nakakatabang samo na masabotan na kun igwa kita nin dayupot na relasyon sa satong Dios, itatao nia sa sato an kosog na maatubang an gabos na klase nin pagbalo.”​—Paulo, Brazil.

“Nagkapribilehio akong mabasa an saindong mga eksperyensia sa 2002 Yearbook. Napukaw na marhay kaiyan an sakong boot, espesyalmente an nakapupukaw sa boot na eksperyensia ni Tugang na Lydia Kurdas. Nakamate ako nin pagkadayupot sa tugang na ini.”​—Nidia, Costa Rica.

“Natapos kong basahon ngonyan an 2002 Yearbook. Mantang binabasa ko iyan, an sakong pagtubod ki Jehova napakosog. An sarong bagay na nungka kong malilingawan iyo an pagkasaysay dapit sa panahon na ikinatanom an mga banhi nin pagduda mapadapit sa mga nangengenot. Itinokdo sa sako kaiyan na nungkang pagdudahan an mga tugang na nangengenot. Salamat na marhay! An espirituwal na kakanon na ini marahay sa puso asin iinaandam kita para sa panahon na tibaad mabalo an satong pagtubod.”​—Leticia, Estados Unidos.

“Nagpapasalamat kami para sa marahayon na Yearbook. Dakol na parahayag an ngonyan pa sana nakabasa kan manongod sa aktibidad kan satong mga tugang sa Ucrania. Napakosog an mga tugang digdi. Dakol, espesyalmente sa mga hoben, an dinugangan an saindang aktibidad nin paglilingkod. An nagkapira nagpoon nang maglingkod bilang regular o auxiliary payunir. Naparigon an gabos kan mga estorya kan mga tugang na lalaki asin babae na naglingkod ki Jehova durante kan pagprohibir.”​—Sarong komite sa paglilingkod kan kongregasyon, Ucrania.

An pagigin fiel kan satong mga tugang sa Ucrania tunay nanggad na nagin gikanan nin pagparigon sa boot para sa banwaan ni Jehova sa bilog na kinaban. Sa katunayan, an regular na pagbasa kan nakaoogmang mga pagkasaysay na yaon sa Yearbook sa kada taon sarong marahayon na paagi tanganing pakosogon an satong pagtubod asin pakatagal sa mahalagang mga panahon na ini.​—Hebreo 12:1.