Nagigirumdoman daw Nindo?

Naapresyar daw nindo an pagbasa kan dai pa sana nahahaloy na mga luwas kan An Torrengbantayan? Bueno, helingon kun masisimbag nindo an minasunod na mga hapot:

• Pira an kapitulo sa libro ni Miqueas, kasuarin iyan isinurat, asin ano an situwasyon kan panahon na idto?

An libro ni Miqueas may pitong kapitulo. Isinurat ni propeta Miqueas an libro kan ikawalong siglo B.C.E., na kan panahon na idto an katipan na banwaan nin Dios nababanga sa duwang nasyon​—an Israel asin Juda.​—8/15, pahina 9.

• Segun sa Miqueas 6:​8, ano an kahagadan sa sato nin Dios?

Kita dapat na ‘gumibo nin hustisya.’ An paagi nin paghiro nin Dios iyo an pamantayan nin hustisya, kaya dapat niatong suportaran an saiyang mga prinsipyo nin pagkasadiosan asin integridad. Sinasabi nia sato na “mamoot sa kabootan.” Ipinaheling nin mga Kristiano an mamomoton na kabootan sa paghimate sa mga pangangaipo nin iba, arog baga pagkatapos nin mga kalamidad. Tangani na kita “magin hababa an boot sa paglakaw sa kaibahan” ni Jehova, dapat niatong rekonoseron an satong mga limitasyon asin magdepende sa saiya.​—8/15, pahina 20-2.

• Kun napapaatubang sa pagkawara nin trabaho, ano an tibaad gustong gibohon nin sarong Kristiano?

Madonong na siyasaton giraray an estilo nin pamumuhay nin saro. Tibaad posibleng gibohon na simple an buhay paagi sa pagbalyo sa mas sadit na erokan o paagi sa paghale nin dai kaipuhan na materyal na mga rogaring. Iyo nanggad, importante na dai na magparahadit manongod sa aroaldaw na mga pangangaipo, na nagtitiwala na kayang pangyarihon nin Dios na makaagwanta kita. (Mateo 6:​33, 34)​—9/1, pahina 14-15.

• Ano an maninigo niatong girumdomon kun nagtatao o nag-aako nin mga regalo sa kasal?

Dai kaipuhan an mamahalon na mga regalo, ni maninigo man na asahan iyan. An pinakamahalaga nanggad iyo an aktitud kan puso kan nagtatao. (Lucas 21:​1-4) Bakong maboot na ianunsiar an ngaran kan nagregalo. An paggibo kaiyan puedeng makapasupog. (Mateo 6:3)​—9/1, pahina 29.

• Taano ta maninigo kitang mamibi nin daing ontok?

An regular na pamibi makakatabang na pakosogon an satong relasyon sa Dios asin sinasangkapan kita na atubangon an grabeng mga pagbalo. An mga pamibi niato puedeng halipot o halawig, depende sa pangangaipo asin mga kamugtakan. An pamibi nakaparirigon sa pagtubod asin nakatatabang sa sato sa pagresolber sa mga problema.​—9/15, pahina 15-​18.

• Paano niato maninigong saboton an 1 Corinto 15:​29, na sa nagkapirang bersion trinadusir na “binabautismohan para sa mga gadan”?

Boot sabihon ni apostol Pablo na an linahidan na mga Kristiano binabautismohan, o ilinaladop, sa sarong pamumuhay na masagkod sa kagadanan na may integridad arog kan kagadanan ni Cristo. Pagkatapos, sinda binubuhay liwat pasiring sa espiritung buhay arog ni Cristo.​—10/1, pahina 29.

• Paano niato naaaraman na an kalabot sa pagigin sarong Kristiano bako sanang paglikay sa mga sala na nasambitan sa 1 Corinto 6:​9-​11?

Si apostol Pablo dai nagtapos sa pagsambit sa mga sala na siring kan pakikisaro, idolatriya, asin pagbuburat. Sa pagpaheling na tibaad kaipuhan an dugang pang mga pagbabago, sia nagsabi pa sa sunod na bersikulo: “An gabos na bagay itinotogot para sa sako; alagad bakong gabos na bagay sa ikararahay.”​—10/15, pahina 18-​19.

• Sairisay an nagkapira sa mga babae kan suanoy na mga panahon na nagpagayagaya sa puso nin Dios?

Kaiba sainda an mga partera na si Sifra asin Pua, na habong magkuyog sa Faraon asin habong gumadan nin bagong mamundag na mga lalaking Israelita. (Exodo 1:​15-​20) An Cananeong patotot na si Rahab prinotehiran an duwang espiyang Israelita. (Josue 2:​1-​13; 6:​22, 23) Huli sa pagpaheling nin marahay na kaisipan, nakatabang si Abigail na isalbar an mga buhay asin protehiran si David sa pagkakasala sa dugo. (1 Samuel 25:​2-​35) Sinda mga halimbawa para sa mga babae ngonyan.​—11/1, pahina 8-​11.

• Paano nangyari na “gikan sa langit na an mga bitoon nakipaglaban” tumang ki Sisara, na sinabi sa Hokom 5:20?

May naniniwala na ini nanonongod sa pagtabang nin Dios. An iba nagsasabi na iyan pagtabang kan mga anghel, pag-oran nin bulalakaw, o pagsarig ni Sisara sa prediksion nin astrolohiya. Huling mayo nin itinataong mga detalye sa Biblia, puede niatong saboton na an mga tataramon na iyan nagpaparisa nin sarong klase nin pag-interbenir nin Dios para sa hukbo nin Israel.​—11/15, pahina 30.

• Huli sa lakop na marhay na pagkadaing labot asin pagkaindiperente sa relihion, taano ta kadakol pa man giraray na tawo an naghihingakong naniniwala sa Dios?

May mga nagsisimba tanganing humanap nin katoninongan nin isip. An iba naglalaom nin buhay na daing sagkod pagkagadan, o nin marahay na salud, kayamanan, asin pag-asenso sa buhay. Sa nagkapirang lugar, an mga tawo naghihingoang mapanigoan an kakulangan sa espirituwal na iyo an resulta kan an Komunistang ideolohiya salidahan nin kapitalismong mga ambisyon. An pakaaram sa siring na mga dahelan makakatabang sa sarong Kristiano na makapoon nin makahulogan na mga pakikipag-olay.​—12/1, pahina 3.